NCSU aser Engineer-in-Chief NPWD senden amen

Dimapur, Chiteni/July 29 (TYO): Nagaland Contractors’ and Suppliers Union (NCSU) Head Office Kohima nungi ketdangsürtemi Engineer-in-Chief (E-in-C) NPWD tasenba Imna Maren Ao den shisadokden senden ka pa indang office chamber nung July 29, 2024 nü mena liasü.

Union tenüng nung NCSU tir Pele Khezhie-i Engineer-in-Chief, Nagaland PWD, Imna Meren Ao nem tenüngsang agütsü aser pa lenisüba kübok Department, contractor aser nüburtem tajangzük angutsü imlaba shia liasü.

NCSU ketdangsür temi Engineer-in-Chief aser department ketdangsürtem dang Nagaland nung sorkar indang department ajak nung yearly works programme mapa kuma inyaktsü atema July 7, 2024 nü NCSU general meeting pangzüng renemba indang angatetdakja liasü.

Sorkari tang totuyuba agüja aliba ama ochishia inyaktsü atema Union-i government establishment ajak nung open tender agütsütsü takhangba agütsü.

Union-isa Engineer-in-Chief dang Union-i tejangja kuli agütsüba Class-1 government registration agizüktsü ajungshia liasü, kechiaser Naga nunger lanur aika Engineering aser danga technical background nungi mapa mangu registration tasen bushir jenti lir. Nüburtem aser contractor ochi temeden atema NPWD den teka amteper inyaktsü ta parnoki ashi.

Engineer-in-Chief Imna Meren Ao-ia Nagaland renloktsü atema department aser contractor külemi teka amteper inyaktsüla ta ashi. Paisa contractor dang mapa shidak inyaktsü ayongzük aser iba ama senden ayongzükba atema pelaba lemsatepa liasü.