NCSU aser NGRC-1CU na ka küma longjemogo

Kohima, Dec 19 (TYO) : Tanü Honibar nü Kohima nung Nagaland Contractors’ & Suppliers” Union (NCSU) aser Nagaland Govt. Registered Class- 1 Contractors’ Union (NGRC-1CU) na ka küma longjemogo aser iba telongjem dang “Registered Nagaland Contractors’ & Suppliers Union (RNCSU) ta ajatsü lemtetogo.
Iba telemtetba osang ya Nagaland nung contractor-tem rongnung tain Wb.Vi-u Belhoi metetdaktsü. Iba osang ya tanü NCSU aser NGRC-1 CU na külem Pre-Christmas amongba den külemi Traffic police-tem rongnung tajungtiba nem tenüngsang agütsüba sentong Hotel Japfu, Kohima nung alidang metetdaktsü.
Iba sentong nung Roads & Bridges kilonser, Y Vikheho Swu aser Forest, Environment & Climate Change kilonser, Neikiesalie Nicky Kire na den SP Kohima Joseph Hesso aser Contractors’ union ana nungi züngsem purtem dena liasü.
” Contractors’ Union ana ya ka küma longjemer külem tebilemtsü reprangtsü aser sorkar dena contract mapatem indang jembitsü,” ta Belho-isa ashi.
Telok ana agi ka küma longjemba ya ka tashi aitba agi mesüra ka tashi maitba agi ta masü saka ajak asoshi külemi longjemer inyaktsü asoshi lemtet. Iba ama telongjem ya kanga nüngdaker, kechiyong tang ama pei lima nung mapa tulubo ajunga tangar bendangertemi inyaktsüsa akümdang, lisopurtemi longjemer ola adoktsüsa akümer ta Belho-isa ashi.
Tanü telok ana küma longjemba agi tenünga tera melenshia RNCSU ta agir saka ita ana-semka tsüngda tenüngji melenshia ajatsüa akok. Iba mapangji ka matong tashi RNCSU nung tir ana alitsü, kaji Pele Khezhie working president asütsü aser Seyiekuolie Kesiezie administrative president asütsü.
Tanü Contractors’ Union ana ka küma longjemba tangatettep tezüluba nung president anaprongla, Pele aser Seyiekuolie-i metetdaktsü.
Tanü iba sentong nung mapang tatsüka agia jembidang, R&B, PWD kilonser Vikheho-i tanü ama telok ana ka küma longjembaji takok tuluka lir aser iba ama telongjem mapa ya tanga teloktem nunga ajizüka inyaktsü imlar ta metetdaktsü.
Nagaland kümer küm 52 tsüngda state kanga renlokogo saka ano mapa aika anünga lir, iba mapatemji khuretsa bilema inyaktsübaji yimten yimsüsürtem kija mapa masü saka business aser contract inyakertem dena senso ajak khuret lir ta paisa metetdaktsü.
Naga nungertem dak anepalua ayuba tangatetba mali, iba jagi lenmanga anepalu mesütetter, ajisüaka asenoki yangluba kiojen aser lenmangtem ya yanglur sülen kanga junga anepalutsüla ta Vikhehoi metetdaktsü.
Iba kasa sentong nung Minister Nicky-ia jembia liasü.
Iba sentong nung NCSU teloki ‘Best Traffic Police Award 2015’ Traffic Constable Imliwapang Ao nem agütsü. Pa ya South Traffic Control, Kohima nung inyaker. Iba senpet nung sen Rs. 10,000 den tenüngsang kuli kaket dena lir.
Iba sentong nung menden NCSU tongti zülur, John Kath liasü aser NCSU advisor T. Yanger Imcheni tepela o metetdaktsü .