NCSU-i Gadkari nem takhangba agütsür

Dimapur, April 2 (TYO) : Nagaland Contractors’ & Suppliers’ Union (NCSU)-i Road Transport & Highway Union Minister, Nitin Gadkari dang shidi ka ajanga Nagaland nung SARDP-NE Phase-I mapatem tembanga inyaktsü atema takhangba agütsüogo.
Iba mapa ya Maytas & Gayatri (JV) ajanga inyaker aser April 1, 2016 nü NCSU Conference hall nung NCSU-i District Unit TCSU ketdangpurtem den külem senden ka amendang, Maytas & Gayatri (JV)-i Nagaland nung SARDP Phase-I kübok mapatong pezü inyakba tembanga inyaktsüla ta bangzünga renem, ta NCSU sangdong ka nung metetdaktsü.
Nagaland nung Maytas & Gayatri (JV) ajanga inyakba mapatong pezüji 1). Longleng – Changtongya road, 2). Mon – Tamlu, Merangkong road, 3). Phek – Pfütsero road aser 4). Zunheboto – Chakhabama road nungertem lir. Item mapatong tembanga meinyak tashi parnok nem Nagaland nung tanga mapa meinyakdaktsütsüla, ta NCSU-i Nitin Gadkari dangi züluba shidi nung shia lir.
NCSU-i India Tir, Union Minister Road & Transport (MoRTH), India Prime Minister aser Nagaland Angh dangi aiben Gayatri & Maytas (JV) atema temepishiba agütsüogo saka tanü tashi parnok anema mapa kecha inyaka mali. Parnoki inyakba mapa ajak tom nung anendaka lir aser senzüka toktsüogo. Anungji, Dimapur-Kohima lenmang 4 laning mapa nung iba kasa tiaji majurudaktsünür, ta NCSU-isa metetdaktsü.
“Nagaland nung tanga mapa inyaka maodang tamasa Maytas & Gayatri (JV) nem parnoki inyaktua aliba mapatong pezüji tembanga inyakdakjang ta onoki akhanger aser iba temepishiba magizükra, onoki kechi junger ta bilemdir inyaka aotsü” ta NCSU-isa Gadkari dang ashi.