NCSU-i lungkak aitba sentong thinener

Dimapur, December 14 (TYO) : NSCU-i December 15, 2015 nü National Highway-29 noktangtsü ayongzükba sentong thinena atatsü lemtetogo, ta NCSU President, Pele Khezhie aser General Secretary, John Kath-i sangdong ka nung metetdaktsü.
Naga nunger mulungtet teloktem -Naga Hoho, Naga Mothers’ Association, Nagaland Tribes Council aser kaketshir teloktem den Angh P B Acharya, Chief Minister T R Zeliang, Lok Sabha MP Neiphiu Rio, National Highways Minister, Nuklutoshi aser yimten telok balalai onok nungita yariba atema kanga pelar, ta Nagaland Contractors’ and Suppliers’ Union (NCSU) mendenpurtemi ashi.
Union Ministry of Roads, Transport & Highways Minister, Nitin Gadkari-i Dimapur-Kohima Road 4 Laning mapatong nung local contractor tem anioktsü atema shilem lemsar inyaktsü shidi ajanga onok dang nenshia ashiba pela agizüker, ta NCSU sangdong nungsa shia lir.
Naga Hoho aser Chief Minister’s Office-i benjung mapang aser ano kaketshirtem tatidang agiba mapang lenmang noktangba sentong magitsü mepishiba NCSU-i pela agizüker. Telok balalai lungkak aitba sentong magitsü mepishiba agizüka NCSU-i tanga osang ka mesangoktsü tashi December 15, 2015 nü ayongzükba sentong thinena atatsü telemtetba agi, ta NCSU President aser General Secretary nati sangdong nung metetdaktsü.