NCSU-i Maytas & Gayatri (JV) mapa anema CM dangi zülu

Kohima, April 21 (TYO): Nübortem mepelaba aser temulung machiba tia ngua, Nagaland Contractors’ & Suppliers’ Union (NCSU)-i Nagaland Chief minister dang Maytas & Gayatri (JV) telok nem Nagaland nung mapa tasen magütsütsüla, ta takhangba ka tezüluba nung agütsüogo.
Maytas & Gayatri (JV) telok nem ya “Special Accelerated Road Development Programme (SARDP) Project kübok Nagaland nung gari ana süiteptettsüsa Longleng – Changtongya road , Mon – Tamlu – Merangkong road, Phek – Pfütsero road aser Zunheboto – Chakhabama road  yanglutsü asoshi sen crore 1132 jenjang lenmang kilometer 332 yanglutsü mapa agütsü. Nagaland tenzüker tang tashi nung contract mapa inyaktsü tulutiba angubaji ibaji liasü saka iba mapaji inyakpeter yuja lir, ta NCSU-i CM dang mepelaba ken o ka metetdaktsü.
Iba kasa tebilemtsü ken o ya NCSU-i Union Minister MoRTH, Wb. Nitin Gadkari nem metetdaktsüogo. NCSU-i pa dang tang inyakpeter yutsüba lenmang pezüji jungjunga merenem tashibo Maytas & Gayatri nem mapa tasen kecha magütsütsüla ta metetdaktsüogo.
Ajisüaka, onok temepishiba ken o ji mangai, National Highways and Infrastructure Development Corporation Ltd. (NHIDCL) aser Union Ministry MoRTH-i  Maytas & Gayatri telok nemsa sen crore 340 jenjang Dimapur – Kohima 4 lane atutsüba mapa agütsübaji Naga nunger mezüngmeshiba mapa ka asütsü ta NCSU-isa metetdaktsü.
“Anungji, Maytas &  Gayatri telok nem Dimapur – Kohima lenmang inyaktsü mapa agüja alibaji parnoki SARDP kübok anguba mapatemji merenem tashi meinyakdaktsütsü aser parnok dang nungi Naga nunger Contractor shinga  mapa agizüka meinyaktsüla aser külemia meinyaktsüla,” ta NCSU-isa metetdaktsü.
Maytas & Gayatri teloki tashi mangai Nagaland nung mapa tasen tenzükra, ibajibo parnok khuret asütsü ta NCSU telokisa metetdaktsü.