NCSU-i table tender ajak agientsü takhangba agütsür

Dimapur, August 22 (TYO) : Sorkari NCSU Registered Identity Card holder temi dang tender nung shilem agitettsü ta lateta aliba ama Nagaland nung Contract aser Supply Works ajak Open Tender ajanga shimtsüla, ta Nagaland Contractors’ & Suppliers’ Union (NCSU) Head Office Kohima Nagaland-i sangdong ka nung metetdaktsü.
Department aikati open tender mesüi table tender ajanga dang Contract aser Supply Works aika agütsür ta osang angazüker saka iba inyakyim ya ozüng alema inyakba lir. Anungji table tender ajanga work order lemzükja aliba ajak agientsüla aser item atema open tender asütsüla, ta NCSU-isa takhangba agütsü.
Sorkari NCSU Registered Identity Card Holder tem dang tender nung shilem agitsü ta lateta aliba atema aiben NCSU-i state sorkar aser department ajak dang iba tetuyuba sülen anidaktsü atema shiyonga arur, saka iba telatetba ama meinyakba atema NCSU-i Head of Department (HOD) ajak dangi Officials Action Committee yoktsü lemtetogo, ta sangdong nungsa metetdaktsü.
(NCSU) Head Office Kohima-isa District Unit (NCSU) Dimapur, Peren, Wokha, Mokokchung, Mon, Tuensang, Longleng, Kipheri, Phek, Zunheboto temi pei pei district nung Head of Department ajak den osang agiteper Head Office dangi yoktsü tetuyuba agütsür, ta NCSU President, Pela Khezhie aser General Secretary, John Kath nati sangdong nung shia lir.
District Unit NCSU-i tanga union nung registration anana agia alirtem mita reprangtsü aser parnok indang membership agientsü atema tetuyuba agütsür. Maneni, NCSU indang identity card maliba Firm mesüra Company dak ozüng tapet agi merenshitsü, ta NCSU mendenpurtemi shisem.