NCSU Identity Card alirtem nem dang contract mapa agütsütsüla: NCSU

Kohima, June 15 (TYO): Nagaland Contractors’ & Suppliers’ Union (NCSU) Head Office Kohima Nagaland-i state sorkar department balala nung Open Tender magütsüi work order agütsüba ajak thitsütsü atema takhangba agütsür, ta tanü NCSU tatong Tir, Tseibou Khusoh aser NCSU General Secretary, John Kath nati sangdong ka nung metetdaktsü.
Union-i mapang shia department ajak dang sorkari December 13, 1985, June 30, 1986 aser October 04, 1995 nü teteyuba nung aliba ama department balalai inyaktsü atema nenshia metetdakja arur.
Maneni Union-i, Nagaland nung contract aser supply mapa ajakji ‘Open Tender’ ajanga asütsüla, aser NCSU Identity Card alirtem nem dang agütsütsüla, ta nenshia akhanger, ta sangdong nungsa lir.
Ajisüaka tongtibang contract aser supply mapatem ajak amai lisopur contractor nem masü saka sorkar tetuyuba alema table tender ajanga non-locals nem dang agütsüba atema nemjemer, ta Union-isa metetdaktsü.
Government Standing Order alema inyakba ya Union-i süoki ia agir, aser Heads of Departments ajak dang item ama mapatem inyakra item ketdangsertem anema ‘legal’ mera agitsü, ta Union-isa metetdaktsü.
Sorkar Department ajaki Government Standing Order nung aliba ama inyaktsüla aser NCSU Identity Card alirtem nem dang contract aser supply mapatem agütsütsü akhanger, ta sangdong nungsa shia lir.
Iba dak alia Union-i NCSU District Unit ajak dang Action Committee nem mapa lemzükja peipei district nung contract aser supply works tasen mita reprangtsü aser Head Office nem iba osangji metetdaktsütsü mepishia metetdaktsüogo.