NCW-i jaokba ama Salman-i parnok den oa majurutep

New Delhi  July 08, 2016 : Actor Salman Khan-i “tashiyim agi raksatsür aliba tetsürtem”-i maginütsüsa jembisemba ajanga National Commission for Women (NCW)-i parnok den Hokolobarnü ajuruteptsü jaok, ajisüaka pai majurutep aser pa okatsür ajanga dang pa telangzüba kar agütsü, ta NCW-i ashi.
“NCW-i Salman Khan dang parnok office nung July 08, 2016 nü arua ajurutepa pai iba o kechi tebilemba nung jembi ibaji parnok temulung anentsüsa rasaa shiang ta metetdaktsü. Aji oda süaka Salman aser par legal teloki yamaji meinyak,” ta NCW Mendenbula Lalitha Kumaramangalam-i sangdong ka ajanga metetdaktsü.
“Ajisüaka NCW-i Salman’er legal telok nungi telangzüba karbo nguogo aser tang item telangzübatemji kanga junga asadangdar,” ta lai shisem.
Salman Khan-i pa “Sultan”  film tangokba mapang shi nung kanga anibelemba agi, “Ni ya tashiyim agi raksatsüba tetsür ka amai kümogo,” ta ashiba ajanga NCW-i pa nem ibaji rasaa shidaktsütsü atema jaokba lir.
NCW-i parnok sasa June 21, 2016 nü actor Salman jaoka taitok meshidaktsütsü telemtetba agi. Salman-i pa okatsür ajanga telangzüba agütsü ajisüaka parnok temulung manenba ajanga July 08, 2016 nü parnok den arua ajuruteper telangzüba agüjang ta tetuyuba agütsü.