NDA den tesendaktep ayuba atema NPCC-i ashishitsü makok: NPF

Dimapur, June 23 (TYO): NPCC Tir, K Therie-i NPF Tir aser Nagaland Chief Minister, Dr. Shürhozelie Liezietsu tanen makai aitsüba ajanga pai kechi shinür ta Naga People’s Front (NPF)-i kanga rataa bilemer, ta tanü NPF Central Office, Media & Press Bureau-i sangdong ka nung metetdaktsü.
“NPF-i NDA den mesüra Centre nung tanga party den tesendaktep ayutsü telemtetba agiba nung NPCC aser parnok Tiri nemnemtsü mesüra tasüngdangba akatsü atema parnok dak temeten mali. NPF-i aniba DAN sorkari taruba Tir election nung candidate kar pusemtsü mesüra pu-masemtsü ta ashiba onük nung tasüngdangba akatsü atema Therie dak temeten khenyongi mali. Kar Tir candidate pusemtsü atema NPF-i NPCC dang nungi temelaba menüngdaker,” ta NPF sangdong nungsa shia lir.
“1977 nungi mesüra BJP medentetdang yongi NPF ya Congress masüba national party den teloktep liasü ta NPCC Tiri kanga junga meteta lir, aser 2003 küm tetenzüklen Congress den madenba yimtenren party temi DAN tentetba mapang nung iba teloktep ya asentenshi aser tashi itshi,” ta NPF-isa metetdaktsü.
“Therie ya mapang ka nungbo NPF-i aniba DAN sorkar nung Minister liasü, aser pai NPF party indang tangatetbatem meteta lir, ajisüaka tangbo pai Tir election nung NPF-i shiba yaritsüar, iba telemtetbaji agitsütsü meranger. Yamaji inyaktsü agibo, Therie-i Tir election atema par party-ia kechi inyaktet, iba nungji dang rangloker inyaktsüla,” NPF Media & Press Bureau sangdong nung metetdaktsü.
“Pei tajangzük angutsü atema tenük mesepshi nung party ka dang nungi ka dangi meyiper lenirtemi NPF party indang tangatetbatem nung tasüngdangba makatsüla, kechiyong iba party-i state jenjang anguba mapang nungi regional atema inyaker,” ta kasa sangdong ajanga metetdaktsü.
“NPF-i Congress party aser party Tir dang nenshia ya metetdaktsür, NPF ya NDA teloktep partner ka lir anungji maneni teloktep tangatetba sülen anidaktsü, aser aitsür shia nem telangzüba magütsütsü, ajisüaka nüburtem tesünep, terenlok aser azükaru lenmang nung tejakleni anitsü,” ta NPF Central Office, Media & Press Bureau-isa metetdaktsü.