NDA-i küm 5 nung saru matu, saka terenlok liasü: PM Modi

Rajahmundry (Andhra Pradesh), April 01 (Agencies): Tanü Ato kilonser, Narendra Modi-i, tesüiba küm pongu nung par sorkari saru matu, ajisüaka terenlok maneni kaogo, ta metetdaktsü.
Saru shidak agütsürtem nem tenüngsang agüja pai, nenoki saru shidak agütsüba ajanga welfare projects aika inyakogo, ta shia Andhra Pradesh nung benoka inyakba welfare project balala zünga metetdaktsü.
Tanü Rajahmundry nung election nüboyim senden ka nung jembidang Ato kilonser, Modi-i TDP tongti aser state chief minister, N Chandrababu Naidu aija jembi.
Chief Minister Naidu-i Polavaram project nung ochimashi inyakogo, ta shia pai, “Tesüiba küm pongu nung saru tasen maliasü. Onoki saru majemaka terenlokbo maneni kaogo,” ta ashi.
Pai ashiba agi, taoba sorkaribo item project inyaktsü senotsü peria mali ta ashi.
“Rafale (aircraft) alitsü atema sen mali ta parnoki ashi,” ta paisa metetdaktsü.
Taoba mapang Defence Minister, Antony-i, Medium Multi-Role Combat Aircraft 126 alitsü atema sen mali, ta jembiba dak sendakba nung Modi-i iba o ya jembiogo.
Naidu maneni aija Modi-i, TDP-i Polavaram irrigation project atema temelung magütsü saka NDA sorkari 2014 küm mezüngbuba cabinet nung iba project agizük, aser tang tashi nung Centre-i state nem sen crore 7,000 agütsüogo, ta metetdaktsü.