NDA-i Mary Kom Rajya Sabha MP shimba atema pelar : Manipur BJP

Imphal, April 24 (Agencies) : India nüjiso anguba sülen tesüiba Centre sorkartemi North Eastern State tema atema kecha meinyaktsü, saka Prime Minister Narendra Modi lenisüba nung BJP-i aniba NDA sorkar aruba sülen North east atema mapa inyaktsür, ta BJP Manipur tir, Th Chaoba-i ashi.
Rajya Sabha nung züngsem kümdaktsütsü atema Centre-i Manipur tsür Mary Kom tenüng benokba atema jembidang Th Chaoba-i iba osang metetdaktsü.
BJP office nung osangbener senden ka nung Chaoba-i ashiba agi, tetsür saisaponger ka Rajya Sabha züngsem kümdaktsütsü atema tenüng benokba ajanga NDA sorkari tetsürtem aser talisa NE State nungi tetsürtem akhümtsübuba sayur.
Mary Kom tenüng benokba ajanga Act East Policy mapa küma inyaktettsü. Mary Kom state-i meyipa arudang BJP Manipur Pradesh-i la pela agizükba sentong tulu ka ayongzüka agitsü. NE State tem nungi tetsürtemi BJP akhümtsübutsüla, ta paisa shisem.
Chaoba-i Food Security Act indang jembidang, sen 3 yong jang seret ka ayoker saka iba tajangzük mangurtemi sen 25 yong alitsüsa akümer. Iba onük atema CAF aser PD minister-i mapa kecha meinyak aser osang kecha mashir, ta ashi.
FSA 2015 ajanga beneficiary card agütsütsü aser local body temi jangotsü alemtsü shia lir, saka Manipur nungbo MLA temi meinpronger aser parnok sasep nung card lema agitsü meranger, ta paisa metetdaktsü.
Manipur nung Fair Price Shop ka dang lapoka mali saka minister-ibo state nung April 25, 2016 nungi Act mapa küma tenzüktsü ta metetdaktsüogo. Iba ya ajanga state sorkar pei ajungtsü atema dang bilema mapa inyakba sayur, ta BJP lennirisa shisem.
Senden nung BJP MLA Kh Joykishan-ia, Rajya Sabha züngsem asütsü atema Mary Kom tenüng benokba atema Prime Minister Narendra Modi nem tenüngsang agütsü.
Iba ya ajanga BJP-i Manipur aser NE state tem meimba sayur, ta paisa ashi.
“Tan mezüng Northeast nungi Rajya Sabha nung züngsem asütsü atema saisaponger ka tenüng benokogo. Iba ya northeast atema konang ka lir” ta Joykishan-isa ashi.
MLA Joykishan-isa, punguben world boxing champion Mary Kom nem Rajya Sabha züngsem akümba atema tenüngsang agütsü.