NDA sorkar küm 2 ajungba tenüng nung ‘Ek Nayi Subah’ sentong agi

New Delhi, May 28 (Agencies) : Prime Minister Narendra Modi-i aniba NDA sorkar küm ana ajungba nüngtem nung Honibar nikongtsütsü Delhi kübok India Gate nung sentong tuluka ayongzüka agi.
“Ek Nayi Subah” ta ajaba sentongji sensaksemba yimya nung agi aser minister temi tasüngdangba tem langzü. Taonung nüngtugu actor Amitabh Bachchan-ia iba sentong nung shilem agia liasü aser pai ‘Beti bachao, Beti padao’ campaign indang onük jembi.
Taonung Modi-i o jembidang ashiba agi, “nübortemi ozü sorkar dang nungi talila imlatsü tenzükogo saka onoka mapa inyaktsü tejangraba tali kümogo.”
“Nisung kari yimtenren tangatetba nung ajemdaker onok aitsür saka mapa ana lir. Kaji terenlok aser kaji aitsüba lir aser nübortemi ana rongnungji koba shimtsüar meteta lir” ta Modi-isa ashi.
Prime Minister-isa tesüiba küm ana tsüngda NDA sorkari ochimashi anema inyakba osang metetdaktsüdang ashiba agi, “küm ana tejakdang osangkaket, TV news bulletin nung ochimashi aser tim masüba indang osangtem teti liasü. Tesüiba sorkartemi ochimashi mashi inyakba ajanga asen linük nung teraksa jenti adoka liasü.”
“Ozü sorkari inyaktetba mapatem indang osangtem shidi ta süra, yangi arua aliba Doordarshan-wallah tem hopta ka shi amungtsüsa akümtsü. Onoki maneni meranga inyaktsü aser iba linük tejakleni anitsü” ta Modi-i ashi.
Taonung Union Minister Rajiv Pratap Rudy-i Skill development programme indang jembidang, India nung teyanglurtem melira Make in India mapatong takok mangutsü ta ashi.
Union Minister, Smriti Irani-i ashiba agi, India nung shisaluyimba inyakyim nung temelenshi adokogo.
“Modi’er sorkar ajanga linük nung skill education jenjang kanga junga kümdaktsüogo,” ta Irani-i ashi.
Minister for Road Transport and Highways and Shipping, Nitin Gadkari-ia o jembidang, “mapatong aika meinyaki anendaka liasü aser onoki itemji tembanga inyakogo” ta metetdaktsü.
“Prime Minister Modi lenisüba kübok onoki terenlok atema tongti süa temulung agütsür aser onoki anogo ka nung highway kilometer 41 yanglutsü sentong lir,” ta Gadkari-isa ashi.
Gadkari-isa ashiba agi, Centre sorkari North East renlokdaktsütsü atema temulung agütsür aser North East dak rangloker National Highways and Infrastructure Development Corporation (NHIDCL) tentet.
“Tesüiba sorkartemi North East dak temulung magütsüi yutsü ta Prime Minister-i bilemer aser iba jagi ozü sorkari iba tesem nung infrastructure jenjang ajungkettsü atema sentongtem atonga inyaker” ta paisa metetdaktsü.