NDA sorkari MGNREGA junga mashidaktsür: Tripura CM

Agartala, March 28 (Agencies): BJP-i aniba centre sorkari Mahatma Gandhi National Rural Employment Guarantee Act (MGNREGA) indang sentong shibangtsütsü meranger, ta Tripura Chief Minister, Manik Sarkar-i aitsür.
“Tang aliba central sorkari MGNREGA indang sen agütsüba tanemi anener aser yimtsüng nung mapa inyaktsü asoshi sentong nokdanger,” ta Tripura State Employment Guarantee Council den Hombarnü nokiongdang senden ka amenba mapang, Sarkar-i ashi. Iba tebilemtsü ya Mongulbarnü state cabinet senden nunga benoka jembiogo.
“Tripura indang Rural Development Minister den state nungi MP asem densema Union Rural Development Minister, Narendra Singh Tomar tekaraba nung New Delhi nung ajurutsü asoshi State Council of Minister temi lemtetogo.
Iba scheme akhi ama agütsütsü aser sen shidak lemzüktsütsü asoshi parnoki sorkar dang ajungshitsü,” ta Tripura Information & Food Minister, Bhanulal Saha-i Mongulbarnü Cabinet senden temer osangbener dang ashi.
“Tang financial year tembangba mapang tashi nung Tripura-i MGNREGA kübok kibong shia nisung kaka nem anogo 79 asoshi mapa agütsüogo, saka taruba financial year (2017-18) nungbu kibung shia nisung kaka nem anogo 38 nungi 42 tashi dang inyaktsü mapa agütsütettsü’,” ta Saha-isa ashi.
“Yimtsüng nung alirtem nem mapa magütsüi rongsen jenti alir temi jangraba inyaktsü asoshi BJP-i aniba NDA sorkari MGNREGA ya anentsütsü südui,” ta Chief Minister-i Cabinet senden nung ashi.
2015-16 financial year mapang India tesem ajunga nung MGNREGA scheme ya junga mashitet. Iba scheme indang asadangba nung linük ajunga indang average ya anogo 48.85 atema dang mapa inyaktsü asoshi linük ajungai agütsütet saka Tripura sorkari kibong shia nisung kaka nem anogo 94.46 atema mapa agütsütet.
Centre nung Congress-i aniba United Progressive Alliance ajanga sorkar yimsüsüba mapang 2006 küm February ita nung MGNREGA ya tenzük.
Yimtsüng nung aliba kibongtem nungi nisung kaka nem financial year ka nung anogo 100 mapa inyaktsü agütsütsü asoshi iba scheme nung renema liasü saka state katia iba mapa shidak meinyaki lir.
Iba scheme ajanga yimtsüngtem nung rongsen renloktsü aser lenmangtem tajungba kümdaktsütsü nükjidong nung tenzük.