NDA sorkari ochimashi sen atema nendaka meinyaker: CPI(M)

Delhi, April 07 (Agencies): Narendra Modi-i aniba sorkari bendanglen nungi ochimashi sen meyipa bener arutsü asoshi nendaka meinyaker, ta CPI-M-i aitsüogo.

“Modi’er sorkar-i black money, saru magütsüi alirtem aser ozüng alema sen amshiba tsütsü temulung agüja inyak asübo parnoki mezüngyongi item inyakyim ajak nokdangtetter lila,” ta CPI-M indang “People’s Democracy” kaket nung yimozüluri ashi.

“Iba inyakyim ya Panama tarensen nung ochimashi sen aser kiojen khen atema sota ayuba dang nungi balaka lir,” ta India-Marxist Communist Party-i ashi.

“Ajisüaka BJP sorkari iba tebilemtsü nung koma anga taka amoka temelenshi bener marutettsü, kechiba süra international inyakyim ajak item ochi mashi sen dem meyokteper aoer,” ta parnokisa ashi.

Indian Express-i India nunger nisung 500 shi ochimashiba maparen nung ajemoka inyakba sangdongogo. Parnok rongnung shishilembar tetsütitem, yimtenren lennirtem, film star tem, corporate executive aser lawyer tem densema lir.

“Bendanglen nungi ochimashi sen meyipa bener arutsü atema sangoktsüba, Modi’er sorkarji parnoki nangzükba inyaktsü atema tepo maket ama kümogo,” ta kasa yimobilem ajanga ashi.

Modi’er sorkar tashii aruba sülen küm ana nung black money atema parnoki tera dang inyaktet, ta kasa yimobilem nung shia lir.

Union Finance Minister, Arun Jaitley aser RBI Governor, Raghuram Rajan nati, bendanglen aliba bank account tem aser rongsen bendenbaji ozüng alema masü ta ola adoker. “Iba ya ajanga chichiba onükji paitoker,” ta parnokisa aitsü.