NDA sorkari Print aser electronic advertise nung sen cr. 3214 indok: RTI

New Delhi, August 31 (Agencies): BJP-i aniba NDA sorkari tesüiba küm asem nung print aser electronic media nung indokba senji tamalen UPA sorkari indokba dang nungi kanga agia timba liasü, ta RTI tasüngdangba ka ajanga telangzüba angu.
Tesüiba küm asem nung NDA sorkari print aser electronic advertise asüba nung sen crore 3,214.7 indok, aser ibaji anogoshia sen crore 3.21 indokba liasü.
Taoba mapang Congress-i aniba UPA sorkari küm 10 yimsüsüba mapang print aser electronic advertise nung sen crore 2658.24 indoka liasü, aser ibaji anogoshia sen crore 1.45 indokba liasü ta asadangteter.
Directorate of Advertising & Visual Publicity (DAVP)-i 2004 küm nungi 2017 küm tashi nung sorkari media balala nung advertise asüba nung sen indokba asadang.
Journalist, Arjun Parmar-i PIL ka agütsüba nungi telangzüba anguba ajanga ashiba agi, BJP-i aniba Centre sorkari tesüiba anogo 1000 nung advertise asüba nung sen crore 3,529 indok.
Tang aliba sorkari electronic media advertising nung 2014-2017 küm tsüngda sen crore 1,585 indok, aser ibaji UPA sorkar mapang 2010-2014 küm indokba dang nungi shilem 80 agi timba indokba liasü.
NDA sorkari sangdong balala nung sen kanga indoker. Parnoki 2014-2017 küm tsüngda sangdong balala agütsüba nung sen crore 315 indok, ajisüaka UPA sorkaribo 2010-2014 küm tsüngda sen crore 202 dang indoka liasü.