NDA Union Minister temi sadema meinyakteter: Gogoi

Guwahati, May 16 (Agencies): Narendra Modi’er sorkar nung Union Minister temi sademsadema meinyakteter, aser onük tilateri atemaa parnoki temelaba agitsüla, ta Assam Chief Minister, Tarun Gogoi-i ashi.
Tanü Gogoi-i pa indang taküm otsü züluba kaket ‘Turnaround – Leading Assam from the Front’ sayatsüba sülen o lemtepba mapang pai, “Tangbo Union Minister tem sadema inyaktsü maongka mangur. Tilateri ka atema-a parnoki temelaba agitsüla. Ni-a Union Minister inyakogo aser aisülen sademsadema jangratema inyak. Ajisüaka tangbo iba tensaji melenshiogo,” ta ashi.
Tatishitsü ka shia Gogoi-i, “Development of North Eastern Region (DONER) Minister, Jitendra Singh-i kü dang, par ministry atema sen lemzüktsütsü tashiji-a Finance Ministry dak lir aser onük tila ka atema-a pa (Singh) tesem ka nungi ka tashi senzüktsüsa akümer ta shiogo,” ta metetdaktsü.
P V Narasimha Rao’er sorkar mapang Gogoi ya Food Processing Industries Minister inyaka liasü.
Assam Assembly elections nung party-i takok angutsü ta shia Gogoi-i, May 19 nü election osang sangdongba sülen Congress Party maneni sorkar tashii arutsü, ta ashi.
Modi-i BJP-i aniba teloktep nung Bodoland People’s Front atema nüboyimtsüba aija Gogoi-i, Ato kilonser kati sub-regional party ka atema nüboyimtsübaji mazü, ta ashi.
“Parnokji (BPF) regional party kata masü, saka sub-regional party lir. Ibaji (Modi-i nübo yimtsüba) ajanga BJP koda masüba tia sayur. Onok sorkar tashii arutsü, aser iba atemaji ni terataba kecha mali,” ta Assam nung chief minister asembenren inyaksang, Gogoi-i ashi.
Tanü Gogoi indang taküm otsü kaketji Rajya Sabha züngsem, Karan Singh-i sayatsü aser osangbener, Shekhar Gupta leniba nung sentongji agia liasü.