NDFB pur züngsem tasen züngoksemdar: Security force

Guwahati, December 18 (Agencies): Tawa apuba National Democratic Front of Boroland (Saoraigra) pur parnok 10-i, Myanmar nung aliba parnok tesep nungi Assam nung züngsem tasen shimoktsü asoshi telok ka yokogo, ta nangzükba Assam nung Security forces-i metetdaktsü.
Osang ka ajanga ashiba agi, 2014 December ita nungi tenzüka meita aoba sentong balala agiyonga aoba ajanga parnok rongnungi züngsem aika khasetogo aser aika puogo, aser iba ajanga züngsem tasen shimoktsü asoshi parnok inyakdar.
Iba telok yagi Sonitpur, Biswanath, Udalguri, Baksa aser Kokrajhar districts tem nung school züngtur anena alirtem aser lanur mapa mongui alirtem dak tali rangloker inyakdar.
“Hokolbarnü Sonitpur aser Biswanath districts nung NDFB pur parnok pezü apu, aser parnok dang ken o ashishiba mapang nung parnoki ashiba agi, Myanmar nung parnok tesep nungi züngsem tasen shimoktsü atema lenir kar yokogo. Parnok ya mentor ama inyaker aser lanurtem parnok telok nung adentsü atema ajungshiba nung yariteper. Parnoki parnok telok nung tasen züngoksemertem Myanmar-i Arunachal adena anir aoer, kechiyong parnoki lenmangtem kanga junga meteta lir,” ta osang ka ajanga metetdaktsü.
B. Saoraigra-i NDFB tekolakba menden 2015 June ita I.K. Songbijit ket nungi belenzük, shibai 2014 küm Adivasi nunger parnok 68 tepsettsü asoshi tetuyuba agüja liasü. Army, Police aser paramilitary forces temi iba telok atsüngdoktsü asoshi inyakdar.
“NDFB (S) puri Sonitpur aser Biswanath district tem nungi züngsem tasen anioktsü asoshi inyakdar,” ta defence o tongdar Lt Col Suneet Newton-i Hokolbarnü telungpur parnok pezü ya apuba sülen ashi.
NDFB (S) nung züngsem tasen anaji Rwdwm Basumatary, 17, aser Bablu Basumatary ta jangjaogo. Tena ya Sonitpur district kübok ka Maibanguri aser ka Bengshimari yimtsüng nungi lir. Rwdwm ya class VIII tashi azüng aser Bablu ya class IX pass süogo.
Security forces-i ashiba agi, parnoki ngutetba recruitment forms nung NDFB (S) “joint recruitment officer” B. Belarcom-i sign sür liasü.
Maneni police temi Chirang district kübok Deobarnü Manas National Park kübok Sisubari arem nung lanur ana; Khagen Basumatary aser Ashok Narzary na apu, aser tena ket nungi SLR rifle ka, magazine ka aser grenade ka ta ngutetogo.
Police temi ashiba agi tena ya Myanmar kübok Taka nung NDFB camp nungi training agili Chirang-i yokba lir.
NDFB (Saoraigra) puri Bodolang nüjiso atema khanga arudar aser par telok ya United Liberation Front of Western Southeast Asia kübok shilem ka lir. Iba telok nung Ulfa (Independent) aser NSCN (Khaplang) densema lir.