NDFB (S) züngsem ajak temai adokogo

Guwahati, January 12 (Agencies): National Democratic Front of Bodoland-Saoraigwra (NDFB-S) nung lennir aser züngsem ajak Myanmar nungi India-i aruogo.
Parnoki Centre sorkar den yimjung olemtep nung adentsü atema India-i aru.
“NDFB-S züngsem tenemprongla Honibarnü Myanmar nungi apusogo. International border nungi Indian Army-i parnok meiner Army base kati ogo” ta NDFB (S) lennir kati ashi.
NDFB (S) tanishisang B Saoraigwra aser par kinungertem Manipur kübok Tamu adena India-i aru aser general secretary B Ferrenga-i anir council züngsemtem aser tangartem Nagaland kübok Longwa international border adena aru.
Assam police-ibo iba dak sendakba osang kecha mashi. Ajisüaka, Intelligence ketdangsertemi ashiba agi iba maparen ya Union home ministry-i inyaker.
Myanmar army (Tatmadaw)-i yaküm January 29 nungi United Liberation Front of Assam-Independent (ULFA-I), National Socialist Council of Nagaland-Khaplang (NSCN-K), NDFB-S aser Kamtapur Liberation Organisation (KLO) teloktem anema mapa inyaka arur.
Sagaing region kübok Ta Ga yimtsüng nung Myanmar army-i NSCN-K indang headquarters atsünga lir.
NSCN-K-i ULFA-I aser NDFB-S teloktem dena India telungpur teloktem Myanmar nung yarir, ta Myanmar army-i tai tongloktsür.
NSCN-K-i ibaji magizükr saka Myanmar Army-i ashiba agi, parnoki NSCN-K indang training schools atsüngogo aser yaküm January o March tsüngda züngsem 36 puogo.
March, 2019 tatemlen NDFB-S indang foreign secretary Ne Esera Evangel aser pa bodyguard na sepaitem tsüngdang temai adok.
Yaküm February ita ULFA-I tanishisang Paresh Baruah-i osangbener dang India sorkari Myanmar dang iba mapa inyaktsü atema rongshi ta shia liasü.