NDFB(P) puri Bodoland State balaka kümtettsü imlar

Udalguri, Mongputeni/October 4 (Agencies): Democratic Front of Boroland (Progressive) aser Centre na ceasefire tenangzüktepba yanglur küm 13 ajunger saka NDFB (P) lenirtemi maneni Bodoland State balaka akhangtsü asoshi mulungteter lir.
Rasemnü Udalguri district kübok Sapekhaiti designated camp nung 32buba Raising Day amungba mapang NDFB (P) lenirtemi state balaka meshitsüba onük benoka jembi. Iba sentong nung nisung 7,000 shi dena liasü.
Iba sentong ya NDFB(P), tir Dhiren Boro-i par telok wako atsüketa tenzük.
Sentong nung o jembidang NDFB (P), general secretary Govinda Basumatari-i, BJP sorkari Bodo nunger takhangba sentoka parnok ashioktsüogo, ta ashi.
“Yimju asoshi jembishinütsüba dak ajemdaker Centre nung BJP sorkari asenok takhangba cold storage nung nongoka toktsüogo aser iba ajanga parnok teyazü tenangzükba jungkai adoka sayuogo,” ta Basumatari-i ashi.
Paisa, sorkari parnok takhangba dak sendakba nung Cabinet telemtetba ka magi tashi NDFB (P) pur teyazü tenangzükba sülen manidaktsü, ta ashi.
Iba sentong nung National Federation for New States, general secretary S. Sanyal tongti tesemdanger asü aser pai Bodo nunger mapang talangka rara aruba ajanga süngjang tajung atangtsü, ta ashi.
“Sorkari küm aika iba lokti ashioktsüogo,” ta Sanyal-i ashi.
Maneni sentong nung o jembidang ABSU tir Promod Boro-i ashiba agi, sorkari tasa balala amshia telungpur den yimjung ken o jembia magüzüi Bodo nunger asoshi sentong tapet yanglua inyaktsüla, shirnoki mapang talangka pei oshi aser sobaliba wazüka ayutsü asoshi khanga arudar.
Kasa mapang nung NDFB(P) assistant publicity secretary B. Bodosa-i sentepa aliba lokti den o jembi aser pa den külemi taoba Raijya Sabha züngsem aser United People’s Party Liberal (UPPL) tir Urkhaw Gwra Brahma aser Indigenous Peoples Front of Tripura vice-president, Ananta Debbarma nungeria iba sentong nung o jembia liasü.
Iba telok otongdar ‘Udangsri’ iba anogo Bodo Sahitya Akademi awardee Nabin Malla Boro-i chiok.
NDFB ya Bodoland balaka kümtettsü nükjidong nung 1986 küm tentet aser küm 19 tashi rara aruba sülen 2005 küm NDFB (P) puri Centre den ceasefire tenangzüktepba ka nung sign asü.