NDPP 2 Dmr II A/C Unit-i tenüngsang agütsüba sentong agi

Dimapur, Chiteni/July 07 (TYO): Taküm agiba Lok Sabha 2018 Bye election dak sendakba nung tanü NDPP 2 Dimapur II A/C Unit-i tenüngsang agutsüba sentong ka ayongzüka agiogo, ta NDPP 2 Dimapur II A/C Unit Tir, R. Aosanen Lkr aser tongti tezülur, T.Meren Longkumer nati sangdong ka nung metetdaktsü.
Party-i mezüngbuba aser tanabuba jenjang anguba Polling Station nem sempet agutsütsü lemteta liasü, yamaji mezüngbuba jenjang angurji polling station 56 Thahekhu B N/W (94.06%) aser tanabuba jenjang angurji 54 Thahekhu S/W (86.16%) liasü aser parnok nem sempet agutsü, ta sangdong nung shia lir.
Item sempetji Vekhosei Nyekha, Akokla (Lucy), Nchumo Kikon, Luola-o Usou aser Supu Jamir nungeri sponsor süa liasü.
Party lenirtem aser züngsemtem ajaki Thahekhu village nem tenüngsang agüja liasü. “NDPP Party yari votes agütsüba atema party-i pelar, aser maneni ozü party tashi taliba aittsü aser state nüburtem ajangzüktsü atema party-i nüburtem dang amalitepa maneni yaridaktsüner,” ta kasa sangdong nung shia lir.
2 Dimapur II A/C Unit-isa asen Chief Minister, Neiphiu Rio dak mangdang tulu aliba aser pa shisa tajung atema pelar; iba denji külemi 2 Dmr II A/C-i NDPP Tir, Chingwang Konyak aser pa den külem tenzükertemi maneni nungitba atema pelar, ta kasa sangdong ajanga metetdaktsü.