NDPP 2 Dmu II A/C-i Dimapur nung tzü metsüngba tesemtem semdang

Dimapur, Luroi/August 27 (TYO): Amongnü, Luroi/August 26, 2018 nü NDPP Dimapur II candidate, Supu Jamir leniba nung NDPP 2 Dimapur II party nung inyakertemi Dimapur River Belt Colony aser Lingrijan Village nung tzümetsüng agi kongshiba tesemtem semdang, aser council züngsemtem aser tzümetsüng agi kongshiba kibongtem den senden ka amen, ta tanü NDPP 2 Dimapur II A/C Tiri sangdong ka ajanga metetdaktsü.
Iba mapang nung Supu Jamir-i tzümetsüng agi kongshirtem ajurua parnok timtem angadang, aser A/C nüburtemi nüngdakba mapang ajak nung pa alitsü, ta ashi.
Supu Jamir-isa parnok dang pai sorkar dang teyari meshitsütsü ta metetdaktsü.
Tesülen tzümetsüng agi kongshiba tesemtem nung Public lenirtem, Chairman, GBs, taintem aser timtem ajangshir kibongtemi Supu Jamir-i timtem mapang nung parnok yariba atema pa dang pelaba lemsatep.
Ano külen Supu Jamir-i Nagaland Chief Minister, Neiphiu Rio-i terenlok mapatem inyaktsüba atema pa dang pelaba lemsatepba den külemi tarutsü nunga pai nüburtem atema mapa tajung inyaktsütsü imlar, ta ashi.
Iba dak alia NDPP 2 Dimapur II-i district administration-i mapang shidak nung tzümetsüng agi kongshirtem yariba atema pelaba lemsatep, ta kasa sangdong nung shia lir.