NDPP 9th Kohima Town ajanga HSLC & HSSLC topper tem tushi

Kohima, Luroi/August 27 (TYO): Kaketshirtem temaba jenjang tongtettsü asoshi meranga inyaktsü ajungshia, NDPP 9th Kohima Town A/C aser Advisor, Urban Development and Municipal Affairs, Dr Neikiesalie Kire nungeri Nagaland Board of School Education ajanga agiba High School Leaving Certificate (HSLC) aser Higher Secondary School Leaving Certificate (HSSLC) examinations 2021 nung topper 27 nem tenüngsang aser tetushi agütsüba sentong ka agia liasü.
Dr Kire’er kidang iba sentong agidang tetushi tesemdanger ka ama jembiba mapang Advisor, School Education, K T Sukhalu-i, “State sorkar nung mapa inyaker lakh 1.2 lir, koba kanga agi talila lir, anungji sorkari ibaji ajemdaktsütsü meranger,” ta ashi.
Tarutsü nunga sorkar nung mapa inyaker ajemdaktsüba maparen maneni inyaktsü aser state nung ano menüngdakba post aika tang tashi lir, koba agientsü, ta paisa ashi.
Government sector nung employment ya kanga ajema akumtsü, ta Sukhalu-i ashi.
Tanü alima ya kanga toktepba lima ka kumogo aser yamaji tarutsü nunga tali ang tokteptsü, anungji temaba jenjang tongtettsü asoshi nükjidong nung rangloker meranga inyaktsüla, ta pai ashi.
Paisa tsüraburtem dang pei chirtem lanuwa mapang tetsükdaktsü balala ajangtettsü asoshi nungita yaritsü ajungshia liasü.
Tekolok ajungba den meranga azüngba ajanga parnok temaba jenjang tongtetba lir, saka dangar den tokteptsü asoshi kaket shisatsü kisüng agi meperitsü, ta pai ashi.
“Tarutsü Naga nunger lokti asoshi nenok dak nükla tajung lir. Aser yamaji Nagaland tajungba kumdaktsütsü asoshi lanurtem dak tangatetba aser yimya tajung lir. Anungji nenok wadang kanga shisa kaa shimtsüola,” ta Advisor Sukhalu-i ajungshi.
Dr Kire-i iba ama sentong ayongzüka kaketshir ajungshiba atema pai pelaba lemsatepa liasü.
Special Secretary School Education, Kevileno Angami-i iba sentong nung jembiba mapang, iba ama sentong yagi meranga inyakba nung süngjang atangba ajiteter aser ano maneni meranga inyaktsü ajungmesor, ta ashi.
Keketshirtemi takok angutsü asoshi meranga inyakba atema tenüngsang agütsüba mapang maneni kasa yimya nung alitsü, lai ayongzüka liasü.