NDPP aser NPP, Nagaland-i aitsür

Dimapur, May 21 (TYO): Arunachal Pradesh kübok Khonsa West Assembly constituency nungi MLA Tirong Aboh taochi melii tepsetba khukhua aitsür ta Nationalist Democratic Progressive Party (NDPP)-i metetdaktsü.
“Tanü putu nung iba ama mebilemdangi inyakba aser lapi mapa aitsür. North East nung tensa süngjema akümba mapang ka iba mapa inyakogo. NDPP President-i anir züngsem ajaki tasür kibongtem den asükhu lemsateper aser Tsüngremi iba mapang tesünep agüjang ta sarasademtsür. Tasürtem tanüla anisüngzük ngudakjangma” ta NDPP Media & Communication Committee sangdong ka nung metetdaktsü.
MLA Tirong Aboh khasetba osang angashia National People’s Party, Nagaland aoksar ta metetdaktsü.
“NPP, Nagaland-i iba inyakyim khukhua aitsür aser bangdak ketdangpurtemi aibelenertem aputsü aser tekaratiba nung tapet temerenshi agütsütsü akhanger. Iba onük ya CBI nem bushisüngdang südaktsütsüla,” ta General Secretary-IPR Ricky Ozukum-i sangdong ka nung ashi.
Tan election mapang NPP party amakbaji tang agi tanabenbuba atalokogo. March 29, 2019 nunga Tirap district kübok telungpurtemi NPP posemer ka tepset aser ka kanga mejungi yirutsü, ta NPP, Nagaland-ia ashi.
Parnokisa tasür kibongtem den mangyim lemsatepba aser yirua alisang taneptsü angutsü atema sarasademtsüba metetdaktsü.