NDPP-BJP-i Model Code of Conduct alema inyak: NPF

Dimapur, Tsüklai 26 (TYO): NDPP-BJP teloktepi Model Code of Conduct alema mapa inyakogo anungji Election Commission of India-i tekaratiba nung ozüng tapet agi merenshitsüla, ta tanü Naga People’s Front (NPF)-i Chief Election Officer, Nagaland dangi shidi ka zülu.
Election tiptema aser timi agitsü atema Election Commission of India-i political party ajak nem Model Code of Conduct tejangja metetdaktsüogo. Iba nung political party aser candidate temi Linük Temzüng nung züluoka aliba alema meinyaktsü atema tenokdangba agüja lir. ECI-i tetuyuba agütsüba nungsa election maparen memenentsü atema mesüra voter tem atsür marutsü atema tenangzükbatem magitsü shia lir, ta NPF-i shidi nung shia lir.
Minister aser tangartemi senotsü teyari mesüra tenangzükba magitsü, mesüra gari lenmang amala yanglutsütsü tenangzükba magitsüla ta ECI-i tetutyuba agütsüba nung shia lir. Ajisüaka, NDPP-BJP-i Tsüklai 26, 2018 nü osangkakettem nung advertisements agütsüba nung tenangzükba aika agia lir aser ibaji Model Code of Conduct alema inyakba lir, ta NPF-i aitsü.
Parnoki Northeast region asoshi Centrally-sponsored schemes 100& funding asütsü aser taruba küm asem tsüngda infrastructure atema sen crore 5300 agütsütsü nangzük. Parnokisa Nagaland nung gari lenmang yanglutsü atema sen crore 10,000, Dimapur-Kohima railway line atema sen crore 3000, power connectivity atema sen crore 800 aser Kohima Smart City atema sen crore 1800 agütsütsü nangzükogo. Iba ya election law kübok ochimashi inyakyim aser aibelen ta agizüka ECI-i NDPP-BJP teloktep dak ozüng tapet agi merenshitsü akhanger, ta NPF-isa metetdaktsü.