NDPP-BJP longjembaji Khristantem mezüngmeshiba lir: NPCC

Kohima, Aenjeti 19 (TYO): Taruba Assemly election nung lokteper tokteptsü atema NDPP aser BJP na longjemtsü, ta osangkaket kar nung adokbaji Khristantem odia mezüngmeshiba lir, kechiyong BJP ji Khristantem reshikangshirtem ta meteta lir, anungji shingaia Khristantem reshikangshidaktsütsü atema vote magütsütsüla, mesüra NDPP-BJP teloktep nem vote magütsütsüla, ta tanü NPCC Media Cell sangdong ka ajanga metetdaktsü.
“State nung yimtenren party temi BJP den loktepbaji Yihuda Iscariot mesüka lir. Neiphiu Rio madenba tashi nungbo NDPP-i parnoki communal forces den madentsü aser secular tangatetba nung nokdaktsü ta jangjajangja jembiogo, taruba election nung teloktep mesüka tangatettep kar alitsü mesüra INC den adentsü onoki bangjema liasü,” ta NPCC sangdong nung shia lir.
“NPF-i küm 15 yimsüsüba mapang nung Neiphiu Rio-i küm 11 Chief Minister ka ama inyakdang BJP, state-i anir aru aser indaktsü. State nung ochimashi inyakyim, sentsüh aser temenen mapatem den aiaura kaa inyakbaji pa ajanga lir. Iba senmangji T.R. Zeliang aser Dr. Shürhozielie nati agizük aser temetongshiba kecha maliasü, aser sorkar inyakyim ajak nung BJP nem tetuyuba agütsütsü atema temelaba agütsü, anungji BJP ama communal party ka tera yangdakja asen sobaliba aser tamang jenjang raksadaktsübaji lenir asemprong aser NPF party ajanga lir,” ta NPCC Media Cell sangdong nungsa shia lir.
“Communal force BJP aser tesendaktep aliba NPF, NDPP aser NPP ama regional party tem tamakok ngudaktsüba ajanga parnok sendoktsü asoshi Nagaland nung nüburtem nem maongka bener arütsüogo. Congress kijai communal forces telongjem anema nokdaker, kechiyong parnok nem asen tamangba aser libaliro tuyutsü atema onoki temelaba magütsütsü. Anungji onoki voters aser secular party ajak dang Congress den longjemer nüburtem aser state communal forces nungi kümzüktsü mepishir,” ta NPCC-isa metetdaktsü.