NDPP & BJP nati terenlok bener arutsü: Rio

Dimapur, Aenjeti 5 (TYO): Prime Minister Modi aser BJP President Amit Shah nati pa lenisüba nung tamang akaba aser NDPP o BJP tsüngda menden lemsateptsü mulungba atema NDPP lennir Neiphiu Rio-i pelaba metetdaktsü.
Tentonü Dimapur nung NDPP indang headquarters nung party senden ka nung jembidang Rio-i ashiba agi, NDPP-BJP tesentaktep ajanga sorkar ketdangsübaren ajungtsü aser Modi-i terenlok bener arutsü mangdang ayuba kübok terenlok lenmang tasen lapoktsü.
NDPP-i yimjung olemtep pusema nungiter aser Naga yimten latettsü atema inyakba mapa nung tetsükdaktsü magütsütsü, ta Rio-isa nangzük.
Senden nung NDPP President Chingwang Konyak-ia o jembidang, nübortemi tanga telok ka aginüba atema NDPP ta tentet, anungji party züngsem ajaki nübortem ajungtsü atema tanen makai inyaktsü ayongzüker, ta ashi.
NDPP-i tashishi melii sorkar ketdangsütsü aser ochimashi o tim masüba anema sorkar ketdangsübaren melenshitsü, ta Chingwang-isa shisem.
Iba senden nung mendenji NDPP Secretary General, Abu Metha liasü aser pai ashiba agi, NDPP-i nübortem taginüba atema inyaktsü aser Prime Minister lenisüba nübok Centre sorkar den tesentaktep yur terenlok bener arutsü.
NDPP-i shimtetba candidate tem rongnung aika ajangshia arur aser lanur temeyoktep lir. NDPP nung yimsüsür tejentem, civil society lennirtem, lanurtem, taoba sorkar ketdangsertem, ozüng nung mongin nisungtem aser takotet nisung aika dena lir. Iba telok yagi sorkar kanga junga ketdangsüa aotsü, ta Abu Mehta-isa metetdaktsü.
Tanü agiba senden nung Chang Baptist Church Pastor Zachariah-i temoatsü meshia sarasadem aser state kübok tesem ajunga nungi party lennirtem aden.