NDPP CWO ajanga tetsürtem atema seminar ayongzük

Kohima, Tsüklai/February 16 (TYO): Nationalist Democratic Progressive Party (NDPP) Central Women Organisation ajanga Kohima nung Hokulbarnü ‘A perfect woman, makes the world beautiful’ omen kübok tetsürtem atema health aser wellness seminar ka ayongzüka liasü.

Iba sentong nung jembidang taoba MLA Dr Neikiesalie Nicky Kire-i ashiba agi, aiben mezüngshi yujaka loktiliba nung tetsür anema alitsü ya kanga tongtipang lir.

Naga nungerbo loktiliba nunga süang mesüra kibong nunga süang, tetsür anema alitsü atema temulung agütsür, ta pai ashi.

Loktiliba indang ken o aser tebilemtsü kasa jenjang nung lemsateptsü asoshi tetsürtem nema kasa maongka agütsütsüla, ta pai ashi.

Naga nungeri tetsür nem maongka shidak agüja Parliament nunga mena lir aser State Assembly nunga lir ta ashi.

Naga Hospital Kohima nunga January ita kisüng nung tetsür 5000 dak temai teyari balala agia liasü aser kasa mapang tebur 4000 shi liasü.

“Tetsürtemi mozüki nung service ajak agitettsüsa asenoki inyaktsüla,” ta Dr Nicky Kire-i ashi.

Linük nunga dangalenbo tetsürtem nem reservation shilem 50 agütsür aser Nagaland nunga Urban Local Bodies atema tetsür atema reservation shilem 33 agizükogo, saka parnoki tajungba inyaktettsü asoshi teyari tali agütsütsüla, ta pai ashi.

Make-up artist Christy Tsanglao-i pei temang anepaluyim indang lemsatepba mapang make-up ya dangar dang sayutsü atema masü saka pei sasa pei dak tamang katettsü aser temulung ulushitsü atema nüngdaker, ta ashi.

Spa massages ajanga anibelen aser temang ngoya-ngoshi nungi anisüngzük angur, ta lai ashi.

NDPP CWO secretary Achung N. Phom menden sür agiba sentong ya Kibubai sayuba sarasadem agia tenzük aser NDPP CWO tir Vikali A. Zhimomi-i pela agizükba o jembi aser NDPP working president B. Bendang Jamir-i melepzüng o jembia liasü.

Iba sentong nung Nito Sheqi Swu aser Nikato Tamang nati temeja ken ka tena lokti ayongzüka liasü.