NDPP-i Abu Metha nem tenüngsang agütsür

Dimapur, Rongjui (September) 3 (TYO): United States sorkari “Regional Project for Asia Pacific, South & Central Asia” nung shilem agitsü atema NDPP Secretary General Abu Metha shimba atema NDPP ketdangpurtem aser züngsem ajaki pa nem tenüngang agütsür ta NDPP Communication & Media Committee-i metetdaktsü.
Iba sentong ya International Visitor Leadership Program (IVLP) kübok agitsü aser sentong aser shilem agir ajak atema US sorkari senotsü teyari agütsür.
IVLP ya 1940 nung tenzükba lir aser alima lennirtem atema US sorkar indang tongtipangtiba exchange programs lir. IVLP program nung taoba India Prime Minister asür Atal Behari Vajpayee dena alima nung lennir aikati shilem agiogo. IVLP-i United States aser tanga linüktem tsüngda tesentaktep yanglutsü meranger, ta NDPP sangdong nung shia lir.
Taküm sentong nung Asia Pacific country 12 nungi lennirtem adentsü aser tanga onüktem den külemi Indo-Pacific Strategy with the US Department of State Bureau of East Asia and Pacific Affairs, and South & Central Asian Affairs dak sendakba onüktem benoka lemsateptsü.
Sentong nung adenertemisa CSIS Reconnecting Asia project office nungi inyakertem den ajuruteptsü aser “Insights into the U.S. Perspective of the Indo-Pacific Region” onük olemteptsü.
Iba sentong nung Abu Metha adentsü shimba atema pa nem tenüngsang agütsür aser pa shimba ya state atema maongka tulu anguba ka lir. NDPP party-i pa moatsür aser iba sentong nung adenba ajanga Nagaland aser sensotem ajangzüktsü teimla ayur, ta NDPP Communication & Media Committee-isa metetdaktsü.