NDPP-i asükhu lemsatep

Dimapur, Mongputeni/October 8 (TYO): Nationalist Democratic Progressive Party tir-i anir party nung inyakertem ajak, NDPP Central Youth Organisation Secretary, Atsiebou Soliezuo mapang tatsüka shiranga aliba sülen October 8 nü ajungben asüba osang angazüka temulung khoremba, sangdong ka ajanga lemsatepogo.
Zhadima yimtsüng nungi Neingulie Soliezuo’er jabaso asür Atseibou Soliezuo ya 1979 küm August 11 nü aso aser pa jala jabaso trok rongnung tasembuba liasü. Atsiebou ya NDPP nung tetenzük nungi züngsem ka liasü aser pai Youth Organisation nung tongtibang shilem agiogo. Pai pa nem nongloktsü mapatem pelashishia kecha menongnangi inyakba teti menungraa bilemtettsü.
Pa iba lima nungi pilaa aoba ajanga NDPP aser talisa Youth Organisation asoshi takoksa tulu bener arutsüogo, shiba teti menungraa bilemtettsü. NDPP tir-i anir party nung tenzüker ajaki asür kibong den temulung ajak agi asükhu lemsateper. Pa tanüla tesunep nung anisüngzükdakja ta sarasademtsüba den asür kibong nem iba amala mangyim jashi mapang tesunep agüjang ta sarasademtsür, ta NDPP tir Chingwang Konyak-i sangdong ka ajanga metetdaktsü.