NDPP-i ayongzüka Mkg nung lokti sensaksem aka

Mokokchung, Nov 4 (TYO): Tawa ang political party ka ama züngsemba Nationalist Democratic Progressive Party (NDPP)-i ayonga nüburtem den sensaksemba sentong ka yangi Mokokchung town hall nung kaogo. Iba sentong nung telok balala nungi lenirtem den nübur aika adenshia shilem agia liasü.
Tanü iba sentong nung NDPP tir, Chingwang-i jembidang, Nagaland state tenzüker aruba nung sorkar tamajungtibaji tang aliba state sorkar ya asütsü, ta pai metetdaktsüogo.
Paisa tang aliba sorkar dak temulung masüba indang kar shioktsüdang, lenmang ajak ayong kümogo, department balala nung mapa inyakba mangur, yimsüsüba bangdak (administration) tazüokba mali küma odaki, ta ashi. “Joko nüburtemi tang aliba sorkar dak temulung melemi kümogo”, ta paisa shisem.
Tanü Nagaland iba ama tensa tiaji ngua aser asen lima iba amai dang ora tali majungtsü ta asüyongji party tasen ka tenzüktsü nüngdakba aser nübur tzüraba ngua Nationalist Democratic Progressive Party ya tenzük, ta pai ashi.
“Tanü joko Congress dak teimla mali, BPJ ya asenok asoshi mapet, NPF-ji telok ana lemdangogo”, ta ashi. Paisa iba dak sentakba nung, “iba ama tia ka nung yimsüsüba tajung bener arua temelenshi bener arutsü asoshi iba party tasenba (NDPP) ya tentetogo”, ta shisem.
NDPP nükjidong kar lemsatepdang, iba party yagi mapa ajak nung ochishia inyaktsü, maparen ajak nung miima meyui otia inyaktsü, teraksa aser ochi mashiba anema inyaktsü, yimsüsüba yimya/inyakyim asentenshia melenshitsü, ta ashi. NDPP nükmenji jenjang akaba yimden dak amanga inyaktsü, ta paisa shisem.
Sensaker aser lokti jenjang tekübokba alirtem asoshi inyaktsü, lenurtem nem temulung agütsütsü, tetsür-tebur lirumedema inyaktsü, tetsür jenjang ajungketba maparen inyaktsü aser tongtibangsa asenok ajaki aginüba Naga yimden tebilemtsü atema awa oa inyaktsü, ta paisa teinyaktsü kar lemsatep.
NDPP ya asenok ajak meyong party ka kümdaktsünür, asen lima yimsüsüba tajung nüngdaker, tarutsü lanu asensor atema teka amteper inyaknür, iba party nung shinga tuluba-tilaba malitsü (high command malitsü), anungji, shirnoksa iba party nung denür, temulunger ajak adentsü kishi lapoka lir, ta paisa tayongzükba ka agütsü.
Sentong nung NDPP Working President, Alemtemshi Jamiria mapang tatsüka agia jembidang, tang aliba sorkar ya tamajung masü saka sorkar maliba den saku lir, anungji, tang aliba sorkar yabo maliang tajungba, ta ashi.
Tanü Nagaland tensa tia majungba ngur, nüburtem ola adoker, nüburi temelenshi aginüba reprangteta “Nagaland tajung yangludi” ta sür iba party ya tenteter, ta paisa ashi. Iba party ya tanga party ka ama masü saka ibaibo nübur party ka asütsü, ta paisa shisem.
Nagaland yanglutsü atema nükla alinung, iba party yagi VIP sobaliba indoktsü telemtetba agiogo, kechiyong ibaji Naga nunger sobaliba nung mali aser VIP-ji nüburtem asütsü, ta NDPP Secretary General, Abu Metha-i ashi.
NDPP party ya 13th October, 2017 nung Election Commission of India nung registered asü aser tangji party temaitsü (Symbol) atema mapa teinyakdak lir, ta osang ajanga angazüker. Iba sensaksem sentong ya Mokokchung nung mezüngbuba akar, iba sülen kasa sentong ya tanga district-tem nunga agiyonga aotsü tebilemba lir, ta osang angazüker.