NDPP-i Kelie Zeliang mapa nungi anentsütsü akhanger

Dimapur, Tsüklai 25 (TYO): Secretary, Urban Development, Kelie Zeliang-i 7 Peren A/C nungi NPF candidate atema nüboyimtsüba osang angashia kanga aoksar aser aitsür ta Nationalist Democratic Progressive Party (NDPP)-i metetdaktsü.
Kelie Zeliang-i sorkar scheme tem ajanga nübortem mesüzüktsü merangba dang masü saka yimjak nung political party ka indang candidate pusemba aser sorkar facility, gari aser security guard tem amshibaji ozüng alema inyakba lir, ta NDPP Media & Communication Committee-i sangdong ka nung ashi.
Pai pa indang menden tim mesüi amshiba dang masü saka sorkari pa nem inyaktsü lemzükba alema inyaksangshiogo. Anungji bangdakpurtemi Kelie Zeliang mapa nungi anentsütsüla aser pa anema benokba ken o atema bushisüngdang ka tenzüktsüla. Ozüng amertemi pa aputsüla aser sorkar mapa inyakertem asoshi tatishitsü asütsüsa ozüng tapet agi merenshitsü akhanger, ta NDPP-i Chief Election Commissioner, Nagaland nem tezüluba ka agütsüba nung shia lir.
Arogotemi ‘Clean Election Campaign’ ayongzükba nung NDPP-i noktaka lir aser nisung ajaki model code of conduct kübok anidaktsü mepishir, ta parnokisa ashi.