NDPP-i Leadership cum Media seminar ayonga kaogo

Chumukedima (Dimapur) Rongjui/September 25 (TYO): Chumukedima nung NDPP Central Headquarter, Conference Hall nung Rongjui/September 24 nungi 25, 2018 anogo NDPP Youth Organisation-i Leadership cum Media seminar ka ayonga kaogo.
Session asem tashi lemsar agiba seminar nung shisalen sayurtemji Founder & Chair YouthNet, Wt. Hekani Jakhalu, Media Officer to Chief Minister, Wt. Ayieno Kechu aser Morung Express Publisher, Wb. Akhum Longchari nunger liasü. Iba seminar nung NDPP Youth Organisation nungi Central Official tem densema Regions Youth Organisation nungi President aser General Secretary tem adenshia shilem agia liasü.
Seminar tenzüka minute ka atema Sericulture & Excise Department Advisor, Asür Imtikumzuk Longkumer nem aküm agütsü. Iba workshop nung nisung ka tashi mait mesüra tashi aitba indang meteta alitsü aser nisung ka indang sempet ajungkettsü asoshi tesayuba balala agüja liasü.
Iba den külemi shisalen sayurtemi, nükjidong tejangja ayutsü, maparen ajak nung ochishia inyaktsü aser ochi nung ajemdaker lanur lennirtem ama tesendaktep shidak yanglutsü asoshi ajungshi.
Seminar nung adenertem nem jenjang aketba onüktem ajanga tesayuba den tajungshiba tajung agütsüba atema NDPP Youth Organisation-i shisalen sayurtem dang pelaba metetdakja liasü.