NDPP-i NH & NMA dang jangjashitsür

Dimapur, August 13 (TYO): Naga Hoho aser Naga Mothers Association-i Nagaland Chief Minister Neiphiu Rio-i jembiba o magizüker ta sangdongba atema NDPP Media & Communication Committee-i osang jangjashitsüogo.
Parnoki ashiba agi “Nagaland Legislative Assembly Speaker Vikho Yhoshu-i August 7, 2019 nü ayongba Joint Legislators Forum (JLF) indang sendenji ‘closed-door meeting’ ka liasü aser iba nung tebilembatem benoka lemsatepa liasü. Iba senden nung latetba bangzüngtem osangkakettem ajanga nübortem dang sangoktsü saka senden nung tebilemba lemsatepbatem yimjak nung metetdaktsüba yabo tim masü aser iba amaisa inyakra, yaserbo züngsemtemi temulung sadoka mejembitettsü. Anungji, iba ama closed-door meeting nung jembiba ajakbo yimjak nung mesangdongtsüla”
Iba senden nung Chief Minister-i Nagaland nung tensa aser Naga Yimten Tebilemtsü dak sendakba onüktem jembi aser idangji pai telongjem indang ashidang Naga Hoho aser NMA ama tongti teloktem longjemshitsü nüngdak ta jembi.
NMA aser NH nungi kin hoho aser telok aikati onük balala nung ajemdaker maden kümogo anungji chief Minister aser PDA sorkari tesüibatem amadoktsü aser longjemtsü atema ayongzüker ta Chief Minister-i iba senden nung ashi. Ajisüaka, NH aser NMA-i osang shitak mangazüki nisung kari ashiba nung dang ajemdaker Chief Minister aitsüba ya tim masü. Parnoki yimjak nung mesangdong dang tamasa Chief Minister den ajurutepa iba osang jangjashitep nung tajungba süla, ta NDPP Media & Communication Committee-isa metetdaktsü.
Chief Minister-i Naga nunger longjemtsüba atema bilema inyaker aser pai Naga telok ajak sabang ka nung longjemtsü nüngdak ta jembia arur. Asenok longjem nung dang yimjung maparen akangshitsü aser tayongzükbatem kokteta aotsü. NH aser NMA-i tanga kin hohotem den yimjung yanglutsüla aser parnok dendaktsür telok tajungba yanglushitsü nüngdak ta Chief Minister aser PDA sorkaribo bilemer. Anungji NH aser NMA ketdangpurtemi iba temepishiba tajungleni agizüktsü imlar, ta parnokisa ashi.