NDPP-i o melenshia jembiba atema aoksar: NPF

Dimapur, Aami (June) 2 (TYO): Nationalist Democratic Progressive Party (NDPP)-i Monupii (May) 31, 2018 nü NPF Tir, Dr. Shürhozelie Liezietsu anema First Information Report (FIR) mebenok saka Election Commission of India dangi shidi ang ka zülu ta osangkakettem nung metetdaktsüba atema aoksar ta Naga People’s Front (NPF)-i tanü metetdaktsü.
NDPP candidate Tokheho Yepthomi atema election agent Prasielie Pienyü-i Monupii (May) 22, 2018 nü Police station Kohima nung Dr. Shürhozelie anema FIR ka benoka liasü. Anungji, osangkaket nung FIR mebenok ta ashiba NDPP ketdangpurtem aser NDPP election agent tsüngda osangtsüsang junga magitep asü mesüra nübortem ratadaktsütsü atema parnoki iba mapa ya inyak asü ta bilemer, ta Press Bureau Naga People’s Front sangdong ka nung metetdaktsü.
NST Tiri India Linük Temzüng Arrla 25 pusema jembi aser iba mapa tajung atema pa police nem pudaktsütsü atema renema liasü saka police ki tonga marudang, party tanishirtem aser temeimertemi pa atema anticipatory bail meshitsü.
NPF Tiri Kohima nung election nüboyimba sentong ka nung tensa raksatsüsa o jembi ta NDPP/BJP-i tai tongloktsü aser parnoki ECI dangi shidi ka züluba den Police Station nunga FIR benok.
Centre nung BJP sorkar aliba mapang linük nung Khristantem aser telok tilatem anema 2015 küm lendong 177 atalokba nungi 2017 nungbo 351 tashi ataloka liasü. NPF Tiri iba onük jembi aser pai India Linük Temzüng Arrla 25 kümzüka ayutsü atema jembi saka NDPP-i ECI aser police station nung pa anema ken o benok.
NDPP-i o belenshia jembiba ya anentsüla aser kangabo tenüng menük mesüi terenlok onüktem atema ang bilema mapa inyaktsü ayongzüker ta NPF Press Bureau sangdong nungsa metetdaktsü.