NDPP-i Opposition aitsür: Naga nunger temeten kümzüka ayutsü

Dimapur, Aami (June) 15 (TYO): Opposition-i kuli tejangja mebushii parnok tenüng agitsü atema onüktem jembiba atema sasa bilemtsür, ta NDPP-i tanü ashi.
Aami (June) 5, 2018 nü State Cabinet senden amendang Citizenship Amendment Bill benoka olemtep aser idangji India Linük Temzüng nung Arrla 371 (A) ajanga Nagaland kümzüka lir aser Inner Line Permit mapa küma inyaker ta cabinet angajema liasü. Iba Bill ya Naga nunger taginüba anema süra sorkari menungnangi anema noktaktsü saka iba ama tensaji majuru tashi Centre sorkar indang maparen nung meinprong masütsü ta cabinet-i telemtetba agi aser iba osangji Aami (June) 7, 2018 nü osangkakettem nung sangdong, ta NDPP, Media & Communications Committee-i ashi.
Chief Minister-i Naga nunger longjemtsüba onük jembiba indang Chief Minister’s Office-i Aami (June) 14, 2018 osang jangjashitsüogo aser Naga nunger ketdangsüba ka kübok kibong ka ama liyonga aotsüba tangatetba nung Chief Minister aser PDA sorkar noktaka lir. Ajisüaka, Naga nungertemi tangar den külemi liyonga aotsüla aser talisa asenok den kidangertem den tesentaktep tajung yur alitsüla. Luchii (December) 18, 2003 nung tanga teinyakdak chief minister Rio lenisüba kübok Nagaland Legislative Assembly-i Naga nunger longjemtsüba indang bangzüng renema liasü.
NPF Tir aser Opposition lennir naprong taoba NPF-i aniba DAN sorkar mapang chief minister inyak saka tena lenisüba mapang Naga nunger longjemtsü asoshi telemtetba kecha magi. Anungji, Chief Minister dak temeyong metuyudang tamasa NPF-i parnoki sorkar ketdangsüba mapang inyakbatem meyipa reprangshitsüla, ta NDPP-isa metetdaktsü.
PDA sorkari Indo-Naga yimten tebilemtsü latettsü atema temulung ajak agi bendanga agüja inyaker aser sorkari tiyongtsü nung teyariteper ka ama maneni inyaktsü. PDA sorkari kodanga Naga nunger temeten aser jenjang nung tetsükdaktsü bentsür marutsü, anungji Opposition-i tim masüba inyakyim ajanga tajangzük angutsü memerangtsüla.
NPF-i ‘Bedrock of Naga Society’ indang jembitsü temeten mali kechiyong tanü parnoki iba kaket zülurtem den külemi longjemogo. Kaket zülur Dr. S. C. Jamir aser pa tenu Ex-Minister S.I. Jamir naprong tanü NPF nung dena lir. Dr. S. C. Jamir’er jabaso Apok Jamir ya NPF züngsem ka lir aser taküm General Assembly Election o Lok Sabha by-election nung NPF candidate liasü. Election anaprong nung pai tamakok angu aser ibaji Naga nungeri iba kaket magizükba kuli sayuba lir ta NPF-i angatettsüla. Anungji, NPF-i mebilemdangi o mashi mejembitsüla aser ‘Bedrock of Naga Society’ kaket indang jembitsü atema aaka bilemtsüla. Onoki ‘Bedrock of Naga Society’ kaket magizüker kechiyong iba kaket ajanga Naga nunger temeten yoka achi, ta NDPP-isa metetdaktsü.
Nagaland nung election nüboyimba otsü nung NPF-i taküm mapa tamajungtiba inyak aser ibaji parnoki Linük Temzüng tangatetba anema aser Model Code of Conduct telatetbatem anema inyakba liasü. NPF tir aser ketdangpurtemi tamangba yimsü aser telok telemsa nung ajemdaker nübo ayim aser NPF President TR Zeliang-i chief minister inyaktsü ta parnoki ashi.
NPF-i TR Zeliang Chief Minister inyaktsü indang jembira parnoki tanga onüktem atema jembitsü temeten mali, kechiyong pai NEHU kübok Kohima Arts College nung graduate asü ta aiben Naga nunger tsüngdang tiyazü jembia aruba sülen 2018 nungbo “BA appeared” ta pai metetdaktsü. Pai tiyazü jembiba agizük saka NPF-i pa Chief minister inyaktsü ta jembir. NPF-i parnok aibelenbatembo magizüker saka tanga party tem aser lennirtem dak tai tongloktsütsü meranger, ta NDPP-isa ashi.
Taküm General Election aser Lok Sabha by-election nung nübortemi magizükba sayuaka NPF-i onük ajak aputsü meranger saka parnok jenjang tamajungba küma aoer aser taoba mapang majurudangba tia tamajung ka parnoki ajurutsü, ta NDPP-isa metetdaktsü.