NDPP-i state sorkar anema mebilemdangi jembir

Dimapur, November 5 (TYO): Tawa tasen tentetba Nationalist Democratic Progressive Party (NDPP)-i Honibar nü Naga yimten mapa nung nüngdak maliba ashishitep ken o kar adokdaktsüogo, ta Chief Minister, Nagaland atema Press Secretary-i sangdong ka nung ashi.
Mokokchung nung NDPP Consultative Meet alidang NDPP lennir kari TR Zeliang-i lenisüba kübok NPF-i aniba DAN Government sorkar yasa tamajungtiba ta jembi. NDPP-i mebilemdangi iba onük jembiogo aser parnoki ano tarutsü nunga yamaisa aibelena jembisemtsü ta ajiteter, kechiyong NDPP-i Nagaland state nung tesüiba, tang aser tarutsü indang yimten tensa atema hao ta mali ama repranger, ta sangdong nungsa shia lir.
NDPP-i mebilemdangi jembiba ajanga parnok tetsükdaktsü ajurutsü akok anungji parnoki jembiba onüktem meyipa agi nungbo kanga ajungtsü, kechiyong 2018 Assembly Elections nung NPF-i NDPP meyaritsü akok mesüra Indo-Naga yimten tebilemtsü asoshi telemtetba ka agira, parnok den tesentaktep tajung mayutsü akok, ta Press Secretary-isa shisem.
Nübortemi den asüngdangyadang temelenshi aginür ta ola agütsüba nung ajemdaker aser nübortem taginüba tongtsütsü tangatetba nung NDPP tentet. Parnoki ochimashi anema raratsü, ochishia inyaktsü aser sorkar ketdangsübaren jenjang tajungba yanglushitsü tenangzükbatem agia iba telok tentet. NDPP nung tongti lennirtem aika taoba DAN sorkar nung tongti tanishirtem liasü aser parnoki inyaka aruba osang bendenba süngdenji tanü sorkar ket nung lir. Anungji, parnoki sorkar anema rara menatsü melena tebilemtsü abenba yimten telok ka ama sentongtem asameyanga parnok jenjang tajung ka amentettsü merangtsüla. Aji ta mesüra, sorkari parnoki inyaka aruba osang süngdenji kakpoktsü, ta paisa tekümdangtsü olen ka ashi.
TR Zeliang lenisüba kübok tang aliba sorkar dak metokmeperi aika lir, saka alima nung sorkar ajak dak metokmeperitem lir. Ajisüaka, sorkari tang adoka onüktem bentettsü meranger aser tarutsü nunga yamaji inyaktsü.
Yimten telok melenshiba ajanga nisung kati sorkar ketdangsübaren mesüra sentongtem indang tangatetbabo mesüra yimya memelenshir. TR Zeliang-i aniba sorkarji Nagaland nung sorkar tamajungtibaji ta NDPP-i shiogo saka parnoki kuli tejangja bener ang iba onükji jembitsüla, ta sangdong nungsa ashi.
Chichiba NPF Party loksaba nungi telok kati May 2017 nung NDPP tentet saka ibaji tang teinyakdak NDPP tanishirtemi NPF Party maparen nung ola mali akümba ajanga liasü. TR Zeliang-i Chief Minister aser Dr. Shurhozelie Liezietsu-i NPF President inyakdang NDPP tentet aser iba otsüji public-i kanga junga meteta lir. NDPP nung tanishirtem indang kinungertemji tang sorkar nung Minister/s aser Parliamentary Secretary/s teinyakdak lir ta parnoki angatettsüla, ta Press Secretary-isa ashi.
Lok Sabha MP, Neiphiu Rio aser tangar kari yaria tentetba NDPP tanishirtemi tanü Chief Minister, TR Zeliang lenisüba kübok state sorkar anema jembir aser ibaji ajanga NDPP-i telung nung tamajung bilema inyaksangshiba jungkai adoka sayur, ta Press Secretary-isa sangdong nung metetdaktsü.
NPF Convention, Dimapur nung NPF Party aser sorkar pusema nungiter ta jembiba teloki Mokokchung nung Consultative Meet nung kasa sorkar tenüng menüktsüba ajanga NDPP-i temeli ana dener jembiba kuli sayur, ta paisa shisem.
NDPP-i , ‘By Deeds, not Words’ omen nung ajemdaker Nagaland tajungba yangertsü meranger süra, sorkar tenüng menüktsüba nung mapang endokba dang nungibo nenok teinyaktsütem nungang temulung agütsü tajungba. Aji ta mesüra, nenoki Lok Sabha MP, Neiphiu Rio President sür aliba NPF Party anema nokdakang, kechiyong tang Chief Minister TR Zeliang lenisüba kübok aliba state sorkar nung iba telok nungi NPF MLA 37 dena lir, ta paisa metetdaktsü.