NDPP-i tenüngsang agütsür aser pelar

Dimapur, Metsüremi (March) 9 (TYO): Nagaland Chief Minister Neiphiu Rio ketdangsüba nung aser Prime Minister Narendra Modi-i pusema nungitba People’s Democratic Alliance (PDA) sorkar nem Nationalist Democratic Progressive Party (NDPP)-i tenüngsang agütsü.
NDPP-i National BJP President Amit Shah, Union Minister of Defence Nirmala Sithararnan, Union Minister of State for Home Kiren Rijiju, BJP National General Secretary Ram Madhav, Manipur Chief Minister N Biren Singh, Arunachal Pradesh Chief Minister Pema Khandu, Assam Chief Minister Sarbananda Sonowal aser Meghalaya Chief Minister Conrad Sangma nunger den tongti ketdangsertem aser tejaokertem ajak dang kanga pelar, ta NDPP Media and Communications Committee sangdong ka nung metetdaktsü.
NDPP-isa Chief Secretary aser Nagaland sorkar nung bangdakpurtem ajaki sentong tajung renema agiba atema tenüngsang agütsür aser sorkar tasen pusema arua adener ajak dang kanga pelaba metetdaktsür, ta sangdong nungsa ashi.
Meghalaya Chief Minister aser National People’s Party (NPP) president Conrad Sangma aser President, NPP Nagaland Ato Yepthomi nati Chief Minister Neiphiu Rio lenisüba pusema nungitba atema tena dang kanga pelar aser PDA nung NPP pelashishia agizüker, ta parnokisa shisem.
NDPP-isa PDA nung yaritepertem- NDPP, BJP, JD (U), IND aser NPP-i Nagaland nung sorkar tasen ka akümba atema pelar aser tarutsü anogotem nunga külemi yaritepa inyaka aotsü imlar, ta NDPP Media and Communications Committee-isa metetdaktsü.
Cabinet mezüng senden nung telemtetba tajung agibatem aser talisa VIP sobaliba agientsü atema lemtetba atema tenüngsang agütsür aser pelashishia agizüker. Iba ya mapa tajung ka lir aser nübortem meimba sorkar ka asüba kuli sayur, ta NDPP-isa ashi.