NDPP-i Vicca S. Aye nem showcause notice agütsü

Kohima, March 2 (Agencies): Nationalist Democratic Progressive Party (NDPP)-i State Youth Wing Vice President Vicca S. Aye nem Show Cause Notice ka agütsüogo.
February 19, 2020 nü NDPP züngsem Vicca S.Aye-i Nagaland Lokayukta tsüngdang Dy.CM Y. Patton anema ken o ka benoka liasü.
Nagaland Police department nung backdoor appointment inyaker ta Aye-i tai tongloktsü aser iba atema NDPP-i pa nem a showcause notice ji agütsüogo.
Tawa Assembly session nung iba onok benoker jungjunga jembitepogo aser Chief Minister-ia iba ken o atema luden ka tentettsü nangzüka liasü. Sorkari police department nung backdoor appointment atema luden ka tentetogo aser parnok nungi osang angutsü atar, ta NDPP party Spokesperson Merentoshi-i ashi.
“Vicca S. Aye-i NDPP Youth Wing Vice President ka ama masü saka pa nija agi ken o ji benok aser party-i iba atema kecha balaka meinyaktettsü. Ajisüaka, party-i pa nem showcause notice ka agütsüogo aser pai telangzüba agütsüba sülen ang party ketdangpurtem aser Disciplinary Action Committee (DAC)-i kechi inyaktsü’ar lemtettsü” ta Merentoshi-isa metetdaktsü.
Iba ken o ajanga NDPP-i BJP den tesentaktep aliba nung timtem kecha mali, ta paisa shisem.