‘NDPP indang manifesto ji TR Zeliang lir’: TR Zeliang

Dimapur, Tsüklai 20 (TYO): Nationalist Democratic Progressive Party (NDPP) ya tangatetba melii yimten mapa inyakba telok ka lir ta tanü Chief Minister TR Zeliang-i aitsü.
Mon district kübok Mon, Longwa aser Aboi tesemtem nung election nüboyimba sentongtem nung jembidang “NDPP indang manifesto ji TR Zeliang lir kechiyong Rio-i state kübok tesem balala nung jembia senzüdang, tanga onük masü saka kü indang dang jembia senzür” ta TR Zeliang-i ashi.
NDPP-i election nüboyimba mapa tenzükba anogo nungi Rio-i TR Zeliang indang tazüngba kuli indang onük jembitsü tenzük aser iba atema TR Zeliang-i ashiba agi, “Nibo Rio ama taila kulikaket magütsü. Pai Lok Sabha MP menden atema toktepdang BA Honours Certificate taila agütsü saka nibo taila kulikaket kecha agüja mali.”
2014 küm Lok Sabha election mapang Rio-i nomination papers agütsüba nung taila kulikaket ka dena liasü aser iba onükji North Police Station, Kohima nung bushisüngdangtsü atema benok. Iba mapang Rio-i pa indang Personal Secretary dak tai tongloktsü aser Kohima College nung Principal o Vice Principal na nem yimjak nun tatok meshidaktsü, ta chief minister-isa ashi.
Rio-i küm 11 tashi Chief Minister mapa inyakdang gari lenmang tesentaktep meliaka Longwa, Pangsha, Avangkhu nung International Trade Centre ta sangoktsü. Ibaji Mon district nung alirtem ayong takong kati ango apui yokba mesüka liasü, ta TR Zeliang-isa shisem.
Rio-i Chief Minister inyakdang state asoshi sen crore 1234 sentsüh toktsür pa Delhi-i ao. Sorkar sen agi Noune Resort, Niathu Resort yanglu aser Cricket Stadium yangluba nung sen crore 25 nungi 75 ajungket aser ibaji Sovima nung par li nung yanglu aser kimung aliba nung sen aika endok, ta Zeliang-isa metetdaktsü.