NDPP lennirtemi PDA candidate nem vote agütsütsü ayongzüker

Kohima, Monupii (May) 22 (TYO): Vote agütsürtemi ruling nung mesüra opposition nung alitsü’ar jungjunga shisadanger May 28 nü Lok Sabha by-election nü vote agüjang ta Rural Development Advisor, MLA Dr Neikiesalie Nicky Kire-i tanü ashi.
“Nagaland nung ali rongsen jenti lir saka asenoki tang tashi Centre sorkar dak dang metaloker alir. Asenoki PDA candidate shimra aser Centre nung BJP sorkar den denra, asüng asenok pelateptsü” ta Dr Nicky-i ashi.
APO Hall Kohima nung NDPP 8th Western Angami PDA nüboyimba sentong nung jembidang Dr Nicky-i “Taruba by-election ya NDPP-i aniba PDA candidate Tokheho Yepthomi aser opposition NPF candidate C Apok Jamir na tsüngda lir, anungji vote agütsürtemi nenok ruling nung mesüra opposition nung alitsü’ar telemtetba agiang” ta ashi.
February 27 state Assembly election nung NPF candidate Keneizakho Nakhro-i NDPP candidate Kevisekho Kruse madak 8th Western Angami menden nungi takok angu.
Assembly election nung NDPP-i tamakok angu saka LS by-election nung nenok opposition nung dang alitsü asü mesüra ruling nung adentsü’ar shimtsü asoshi maongka angutsü, ta Dr. Nicky-isa ashi.
Taoba mapang Naga nungertemi yimten latettsü atema mokokteti liasü, saka tang iba tebilemtsü tembangtsü atema tatembangleni arudar. Anungji asenok Naga nungertemi tangbo iba maongka mesüidaktsütsüla, ta paisa shisem.
Tokheho nem vote agüjang ta ayongzükdang Dr. Nicky-i ashiba agi, Tokheho ya aika ajangshia aruba lennir ka lir aser parliament nung Naga nunger taginüba atema noktaktsü asoshi pa temsüa lir.
NPF-i küm 15 tashi BJP den yaritepa arudang NPF-i BJP anema ola madok saka tang BJP-i NDPP den yaritepba ajanga NPF-i BJP aitsür aser Khristanten anemba party ka ta ashir, ta paisa metetdaktsü.
Nisung aikati MP election ya State Assembly election ama süoki ia mebilemer saka NDPP candidate nem takok tulu ngudaktsütsü atema nübortem dang vote agütsütsü mepishir, ta Dr. Nicky-isa shise.
Constituency nungi NDPP Ex-candidate Kevisekho Kruse-ia o jembidang, taoba state Assembly election nung pa yariba atema pelaba den Tokheho nem vote agüjang ta ashi.
PDA sorkari temelenshi bener arutsü atema tenangzükba agir mapa inyaker aser asen state ajungkettsü atema inyaker. Sorkari mapa tajung kar tenzükogo aser ibaji nisung ajaki meteta lir, ta Kevisekho-isa shisem.
Taoba sorkar ama masü saka tangbo Chief Minister Rio lenisüba nung sorkar jungjunga lir aser tashitait sorkar ka ajanga asen state rongsenkettsüng jenjang ajungkettsü aser iba tajangzükji nübortemi angutsü, ta paisa shisem.
“Nenoki Neiphiu Rio lenisüba junger ta süra pa aser PDA teloktepi shimba candidate Tokheho nem vote agüjang” ta Kevisekho-isa ayongzük.
Sentong nung By-election atema Chief Agent Prasielie Pienyu-ia o jembidang, “NPF tir Shurhozelie Liezietsu-i Hinduism atema Tokheho nem aser Christianity atema C Apok nem vote agüjang ta jembibaji election model code of conduct alema jembiba lir” ta ashi.
Tawa Dr. Shurhozelie-i AAP dangi Ura Academy indang official pad nung political shidi züluba aser aibelenogo ta nangzükba atema Prasielie-i shisashirtem dang iba onük atema parnok tebilemba metetdakjang ta ayongzük.
Dr. Shurhozelie-i NPF tir nungi anentsüla ta paisa takhangba agütsü.
Sentong nung mendenji Vikholie Yiesie liasü, Naga Bazar Baptist Church Associate Pastor Mezhüzolie Meyase-i temoatsü meshia sarasadem aser NDPP Western Angami A/C tir Vitsaolhou Kesieizie-i anküp tepela o jembi. Sentong nungsa ex-candidate Kekhrie Yhome aser Neivikuolie Khatsü natia o jembi.