NDPP nungi Sharingain-i by election nung takok angu

Mokokchung, May 23 (TYO): India lima ajunga den külemi Mokokchung district nunga Parliamentary Election aser 26 Aonglenden Assembly Constituency bye election agiba indang vote azüngba maparen takok ngua agiogo.
26 Aonglenden assembly constituency bye election nung Nationalist Democratic Progressive Party (NDPP) candidate, Ungma nunger arishi küm 37 tain Sharingain Longkumeri Indian National Congress (INC) candidate, Alem Jongshi (NCS Rtd) madak vote 6245 agi ayongayonga takok nguogo. Aonglenden nung ya voters ajak agi 12,482 lir aser item voters rongnung 11,014- dang vote ajena liasü. Item rongnung NDPP candidate-i vote 8607 aser INC candidate-i vote 2362 angu. Item rongnungji NOTA vote 28 aser postal ballot papers ajanga aruba rejected vote 17 liasü.
Mokokchung district constituency ter (10) nung NDPP-i INC madak vote 5580 agi teimba liasü. NDPP-i vote ajak senteper 61808, INC-i 56228, NPP-i 983 aser Independent-i 373 angu. Item rongnung NOTA ajak agi 203 liasü saka rejected vote bo kata maliasü. Mokokchung district kübok aliba Assembly Constituency 10 nung ya voters ajak agi 138758 lir aser item rongnung voters 119595 agi shilem agiba osang jangjaogo.
NDPP candidate Sharingaini takok tulu ngur külen osangbenertem den jembidang, Tsüngrem temoatsü adenba den Aonglenden constituency sangertemi pa nem maongka tulu agütsüba asoshi pelaba den tongtibangsa lanur voters-tem dang kangasa pelaba lemsatepa liasü.
“Ni tejak tasen ka dang asünung, ni vote paikadi akoktsübo imlaa maliasü”, ta ashi. “Ni takok angutsü tasaji meteta liasü aser iba nungji Tsüngrem teyari aden,” ta pai shisem.
Iba osangbeneri Sharingain dang nai mezüngbuba mera inyaktsü bilemer? ta metetnüa asüngdangdang, asadangba makai sentongji meyanglutet nung tamasa mapa ajak nung district administration den tongtepa kechi nungdaktemsa lir, itemji asadangtsü, aji sür külen ang maparenji tenzüka aotsü, ta ashi.
“Aonglenden constituency ya Nagaland nung tongtibang constituency ka lir, iba constituency ya temelenshi adokdaktsüba aser tatishitsü sayuba constituency ka südaktsütsü tejangraba lir”, ta paisa shisem.
Nai kechi mapa (portfolio) atatsü imlar? ta metetnüa asüngdangdang, “Aonglenden ya tongtibang constituency tulu ka asünung portfolio tajung ka lemzüktsütsü imlar”, ta menürema ashi. “Ni sports tourism nung kanga jangrar aser iba nungji khen temulung agütsünür, kechiyong iba nung ya teinyaktsü wadang aika ajiteter aser yangji ngujem tulu angur”, ta paisa shisem.
Na lanur candidate ka ama noktak asünung lanurtem atema kechi inyaktsütsü? ta asüngdangdang, Aonglenden A/C nung ya voters 12482 rongnung arishi küm 18 nungi 35 tsüngda alirtemji 5637 shi lir, “parnokji sempet aketer jenti lir, parnokji asenok asoshi rongsen lir, anungji, parnok anitentsü asoshi lenmang balala bushitsü, parnokji kodang tim lenmangi anidir asenok asoshi tarutsü tiaji jangratemtsü asütsü”, ta paisa shisem.
Bye election nungbo nai vote aikadi akok saka MP election nungbo Congress-i vote aika ngutetba kuli metetnüa asüngdangdang, “Aonglenden nung ya Congress party terayanga lir aser parnokia kanga junga inyakogo”, ta menürema langzü.