NDPP ya regional party masü: Dr Shurhozelie Liezietsu

Pfutsero, Tsüklai 23 (TYO): Nationalist Democratic Progressive Party (NDPP) ya regional political party ka masü anungji State Assembly election nung Naga People’s Front (NPF) candidate tem shimang ta tanü NPF tir Dr Shurhozelie Liezietsu-i mepishia metetdaktsü.
“NPF-i Naga maitsü atema noktaker aser onok Nagaland nung lir. Anungji NPF ya Naga nunger atema” ta pai ashi.
NPF ya Northeast nung tejentiba aser India nung tanabuba regional party lir. Mezüngbo NDPP ta asüdang ‘N’ zülujangji ‘Nagaland’ mesüra ‘Naga’ ta asütsü akok ta bilem saka ibaji ‘Nationalist’ lir. Parnok indang tamaitsü noksaji ‘Globe’ lir aser iba jagi parnok ya national party ka aser alima ajunga ayimsünga onüba sayur, ta Dr Shurhozelie-isa shisem.
NPF indang tamaitsü noksaji an tebong lir aser iba telok ya Naga nungeri pei sasa ketdangsüa aotsü atema mapa inyaktsü tenzükba mapang tentetba lir. BJP ya saffron party ta ajar aser iba sentsü ya ‘Hindu sadhu’ temi sübor. Külen, NDPP ya registered party ka dang lir aser Election Commission of India(ECI)-i ano magizük, ta paisa metetdaktsü.
NPF-i BJP den küm 14 tashi tesentaktep yur mapa inyaka aru saka onoki parnok den menden lemsateptsü memulung. Iba jagi NDPP aru aser BJP nem menden 20 agütsütsü tenla. Iba ya Naga nunger yoka chir sorkar ketdangsütsü tashi angutsü atema dang lir, ta paisa ashi.
NDPP ya BJP den kibong kümogo aser joko parnoki kobi melii Naga nunger li nung BJP indang tanurtem asotsü. Anungji, Naga nungertemi kanga dang shisa kaa vote agüjang ta ayongzüker, ta NPF tirsa ashi.