NDRF-i sanitization drive sentong ayongzük

Kohima, Aami/June 03, 2020 (TYO): COVID-19 den peta 12th BN NDRF Doimukh indang team kati Local Ground, Kohima nung sanitization drive sentong ka ayongzük aser coronavirus wara azüoktsü asoshi mulungsoa inyaker NYKS volunteer ajak nem tejak nembangba mask aser surgical glove tem lema agütsü, ta sangdong ka ajanga metetdakja liasü.
Iba sentong nung team lenir, Sub inspector K. P. Singh-i ashiba agi, COVID-19 azüoktsü asoshi NYKS volunteers maparen nung pusema NDRF team longjemer Indira Gandhi Stadium, Kohima temeküt ajak nung sodium hypochlorite mozützü khaloktsü.
COVID-19 dak sendakba nung NDRF team-i linük tenzüktsü asoshi renema dang lir aser iba wara samatsütsü asoshi NDRF-i maneni bendanga agüja inyaktsü, ta Singh-i ashi.
Mesen südaktsüsü atema, 12th BN NDRF indang sepaitemi jet spray machine aser motor teyari ajanga amshiba spray machine nung sodium hypochlorite (NaOCl) mozü aser tzü meyokteper ground meküta khaloktsüogo. Iba mapang team züngsem ajaki PPE (Personal Protective Equipment) abensa semer inyaka liasü, ta Singh-i shisem.