NE amakba nung Intelligence-i China dak mulung malemer

New Delhi, June 08 (Agencies): Tawa Northeast tesem nung telungpurtemi sepiatem amakbatem nung Chinai shilem agia lir südi ta Indian intelligence agency temi Temulung malemer, ta tanü osang ka ajanga ashi.
“China-i telungpur teloktem yariba ajanga Northeast nung mepetmesü adokdaktsütsü meranger,” ta intelligence agency temi ashiba osang ka ajanga metetdaktsü.
Anogo ishika tejaklen Manipur nung telungpurtemi India nunger sepai 18 kahsetba,aser Deobar nü telungpurtemi Arunachal Pradesh nung Assam Rifles camp ka amakba sülen iba osang ya tanü metetdaktsüogo.
Ano külen tanü sangdong ka ajanga Minister of State for Home Affairs Kiren Rijiju-i, tawa northeast tesem nung amakbatem ya Centre sorkari süoki ia agir. Iba tebilemtsü asoshi state police aser Central sepaitem senteper inyaktsüla, ta ashi.
“Tawa telungpur teloktemi Northeastern state temnung amakbatemya onoki süoki ia agir.Item ama tebilemtsü ka bentettsü asoshi onoki lenmang bushidangi.Arunachal nung amakbaji security sepaitem ia meyiper kahtep aser nisung asüba mesüra yiruba maliasü. Iba tebilemtsü asoshi state police aser Central sepaitem na senteper inyaktsüla. Tesem nung yimjung alitsü asoshi lenmangtem onoki lemtepdagi,” ta tanep Rijiju-i Delhi nung osangbenertem dang ashi.