NE artsülen aliba yimtsüngi telongpur marudaktsür

Guwahati, Oct.13 : India aser Myanmar arrtsülen aliba yim ka tenüng agi Niausa nung alirtemi telongpurtem shinga par yimtaki marudaktsütsü telemtetba agiogo.
Iba yim ya Arunachal state nung India aser Myanmar na arrtsü nung lir aser küm aika Naga nunger telongpurtem asoshi iba yim tamongdak tesem tajung ka liasü. Talisa NSCN-K telok oli aruli jajaba mapang anenzüdak tesem tajung kaji iba yim liasü. Iba hopta tetenzüklen telongpurtemi India sepaitem amakba sülen yimtaklirtemi iba ozüng ya agütsü. Lendong mapang telongpurtemi yimtaklirtemji jung kümdaktsür parnok dak jenoker ta India sepaitemi aitsü.
“October 10 nü NSCN-K telok südi ta temulung malemba telongpur telok kati Indian Army alidak tongtibang tesem ka amak aser iba sülen parnokji onok dak jenok,” ta yimtaklir kati shiogo ta sepaitemisa metetdaktsü.
Iba ama yimtaklirtem timtemtsüsa telongpurtemi timtem agütsüba ajanga Arunachal Pradesh nung Longding district kübok Niausa nungertemi kanga jashia telongpurtem anema apuso.
Tamalenbo küm aika yimtaklirtem ya telongpurtem tenük aser tenarong ser yaritepa aru. Ano, yimtaklirtem jagi Northeast pur telongpurtem parnok yimtak anendakja anepalua aru saka tangbo parnoki telongpurtemji marudaktsütsüang mulungtetogo.
Niausa anasa arrtsülenji nisungtem melamelaa senzütettsüsa lenmang sadema lir, iba jagi telongpurtemi iba tesemji parnok asoshi tongtibang kümdakja amshir.
Ajisüaka, tangbo yimtaklirtemi meyariba ajanga NSCN-K teloka timtem aika ajurudagi ta sepaitemisa metetdaktsü.
Taoba ita nung India ato kilonser, Myanmar-i aoba sülen balaka India sepaitemi NSCN-K purtem arrtsülen alirtem ya kanga arishi tenzükogo.
Myanmar nung NSCN-K telok alidak aser parnok teyari agia alir tangar teloktem alidak tesemtem Indian Special Forces purtemi kanga junga mitdagi ta angazüker.