NE atema CAB nung provision balaka inoktsütsü imlar: Biren

Imphal, Mongputeni/October 8 (Agencies): Manipur chief minister N Biren Singh-i Hombarnü, Centre-i North East nung aliba indigenous nisungtem kümzüka ayutsü atema Citizenship Amendment Bill (CAB) nung provision balaka inoktsütsü temulung lema bilemba lemsatepogo.
Union home minister Amit Shah-i October 1 nü ashiba agi, CAB ya Parliament nung agizüktsü, aser iba ajanga Afghanistan, Bangladesh aser Pakistan nungi Hindu, Sikh, Buddhists, Jain, Parsis aser Khristan tem, parnok ket nung kuli kaket tejangja meleiaka India nung küm tenet aliba sülen lisopur jenjang agütsütsü.
North east nung aliba nüburtemi item nisungtem nem lisopur jenjang agütsüba ajanga iba tesem nung nüburtem libaliro nung kongshitsü aser maitsü mezüpelanga akümtsü ta tsubua bilemer.
“Centre nung lenirtemi North East nung aliba indigenous nisung tem kümzüka ayutsü asoshi jenjang tapet akümtsü ta onoki temulung lema bilemer,” ta Biren-u osangbener den sensaksemba mapang ashi.
Honibarnü BJP tir Shah-i Aizawl semdangba mapang Mizoram chief minister Zoramthanga-i Northeast India atema CAB nung provision balaka inoktsütsü asoshi ken o benoka jembiogo.
Kasa mapang nung Biren-i, November ita Sangai benjung amungba mapang Shah-i shilem agitsü ta ashiba den nüburtem dang iba mapang nung longkak aitba sentong kecha ayongzüka magitsü asoshi mepeshia metetdaktsüogo. Iba benjung ya Manipur nung küm shia amungba sobaliba benjung tulu ka lir.
Taküm küm tetenzüklen Manipur nung CAB anema longkak aitogo. October 3 nü Manipur, Nagaland aser Meghalaya nung iba tashishitsü aketba bill anema logkak aitogo.