NE atema Centre-i high-level committee ja amenokogo

New Delhi, October 4 (Agencies): Sorkari northeast state tem nung water management atema high-level committee ka kümtetogo, ta ketdangser sangdong ka ajanga metetdaktsü.
Taküm August ita tzümetsüng tensa aser teyari agütsüba maparen balala asadangtsüba atema Ato Kiloner Narendra Modi-i Guwahati mesemdang tsüngda iba panel ya kümtet.
Iba committee ya Niti Aayog vice-chairman Rajiv Kumar-i anitsü. Iba ajanga hydro-electric power, tzülu ayimba, bio-diversity conservation, tzümetsüng aser anentsü nokdangtsüba, inland water transport, forestry, fishery aser eco-tourism dak sendakba nung tajangzük aludaktsütsü asoshi teyari agütsütsü.
Iba telok ajanga maneni north east nung water resources tsütsü jenjang agitettsü aliba tem asadangtsü aser itemji Union ministries scheme balala den sendaktepdaktsütsü asoshi sentong yanglutsü.
Iba committee ajanga parnok indang report 2018 June tashi nungbo agütsütsü.
Assam, Manipur, Nagaland aser Arunachal Pradesh chief minister tem den tzümetsüng dak sendakba nung lepa reprangshiba senden ka akadang Ato KIlonseri NER nung water resources management atema high-level committee ka kümtetba metetdaktsü.
NE nung Brahmaputra aser Barak ayong ajanga mapang shia tzümetsüng lendong bener arutsür. Brahmaputra ya alima nung river system tulutiba rongnung ka lir aser iba ajanga iba tesem nung aliba tesemtem aiben metsüngbanger.