NE business jenjang ajak dang teküpoktiba lir

New Delhi, October 31 (Agencies) : Linük sorkari North East state tem ajungkettsütsü tenangzükba agüjaka business inyakyim nung Hombarnü tan tesüsa asadangba osang nung iba tesem ajak dak teküpoktiba jenjang nung lir.
Centre-i World Bank den lokteper yangluba, Assessment of State Implementation of Business Reforms, 2016 osang nung north east nung aliba state temi business tsütsü noklang nung shilem  0.30 ang nguteta aliba shia lir.
“Northeast, Jammu & Kashmir aser union territory kar nung temulung kanga agütsütsü nüngdak,” ta New Delhi nung iba osang metetdaktsüba mapang Commerce Minister Nirmala Sitharaman-i ashi.
Iba osang ajanga ashiba agi, Tripura-i noklang nung shilem 16.67 nguteta North East state tem rongnung temaba jenjang nung lir aser 2016 küm India rangben nung iba state jenjang 22buba nung lir. 2015 küm parnok jenjang 26buba nungang liasü.
Aji oda süaka Assam bo 2015 küm jenjang 22buba nung liasüba taküm shilem 14.29 nguteta 24bubai aluogo.
Assam sülen Nagaland-i shilem 1.49 nguteta jenjang 26buba nung aser Manipur-i shilem 1.19 nguteta jenjang 28buba nung lir. Manipur sülen Mizoram shilem 0.89, 29buba aser Sikkim shilem 0.60, jenjang 30buba nung lir.
Kasa osang nung Meghalaya aser Arunachal Pradesh nati shilem 0.30 nguteta jenjang 31buba nung ajak dang teküpokba nung lir.
“Sorkari linük anüdolen aser anodoklentip tsütsü anüdoklen aliba state tem den inyaktsü mulunga lir,” ta Sitharaman-i ashi.
Andhra Pradesh aser Telangana state tem taküm mezüngsüa temaba jenjanglen tua lir, ta iba osang nung shia lir.