NE Film Feast nung Naga nunger film yanglurtem sempet angu

February 20, 2016 nü, IG Park, Itanagar nung Kivini Shohe-i Best Documentary film award amer tangokba noksa yangi angur.

Dimapur, February 22 (TYO) : Arunachal Pradesh yimtiba Itanagar nung aliba IG park nung February 20, 2016 nü ‘Film, Northeast 2016’ sentong akaba mapang Kivini Shone-i direct asüba ‘Oh My Soul’ film ajanga Best Documentary film award angu. Iba film ajanga sempet den külemi senpet sen lakh ana dena ngua liasü.
Ano film tatsü (Clapperboard) toktepba tarensen nung Sophy Lasuh aser Sesino Yoshu nati direct süa produce asüba ‘Story of a House’ film ajanga Best Director Award angu. Iba film ya India nunger kibong ka kechiba anüngdang India nung alir saka aonungbo Myanmar nung oa ayiper ta teratet dena agütsüba otsü lir. Iba film yagia sempet ka nguogo.
Nagaland State nungi tetoktepba nung adenba film temji Kivine Shohe-i direct asüba ‘Anishe-Flower Maiden’, Tiakumzuk Aier-i direct asüba ‘The Wake up Call’, Razousituo Pusa-i direct asüba ‘Handmade Arts & Crafts in the Misty Mountains’ aser Bokavi Swu-i direct asüba ‘Can you’ film tem liasü.
Tetoktepba tarensen aika rongnungi ‘Chairoscuro’ telemsa nungi Assam nunger Jahnu Barua-i direct asüba ‘Ajeyo’ film ajanga Best feature film sempet angu aser iba takok marok den senpeta sen lakh pongu angu. Iba film ya Shankar Lall Goenka-i produce asüba lir.
Iba telemsa nung Meghalaya nungi Pradip Kurbah-i direct asüba ‘Ri-Homeland of uncertainty’ film ajanga best director, best editor, best actor aser negative role nung best actor sempet tem angu.
Film Northeast 2016 sentong ya Information & Public Relations Department of Arunachal Pradesh aser Film Federation of Arunachal na telungjem nung ‘Saluting talent Nurturing passion’ omen nung ajemdaker ayonga aka.
Iba pezünü amungba sentong nung North East nungi film 84 tashi sayua liasü aser olemtep sentonga aika kaogo.
Nagaland nungi nisung pezü agi akümba telok ka, IPR assistant director Tialemba-i anir film yanglurtem Kivini Shohe, Tiakumzuk aser Anungla Longkumer nunger iba pezünü amungba sentong nung dena liasü.