NE Games: Nagaland-i medal 38 agizük; 3 buba jenjang angu

Imphal, March 08 (Agencies): Manipur kübok Imphal nung tan March ita 2-7 nü tashi ayonga asayaba National Level North East Games asayamong nung Nagaland teloki 3 buba jenjang nguogo.
Nagaland teloki gold 9, silver 9 aser bronze 20 densema ajak agi medal 38 tashi agizüka tasembuba jenjangji angu.
Tan asayamong nung Manipur telok champion aser Mizoram teloki tanabuba jenjang ngua liasü.
Asayamong tatembangba anogo, yashi, Hombar nü Nagaland tebur football teloki goal 5-4 agi Mizoram madak takok ngua football tetoktepba nung champion telok akümba osanga jangjaogo.
Atazüktsüba asaya mapang tembang tashi nung telok anaprongi goal 1-1 agüja kasa jenjang anguba yong takoker shimtsü asoshi tie-breaker metsüteptsüsa aküm aser tatem nung Nagaland teloki goal 5-4 agi takok angu.
Ajisüaka, tetsür football final nung Manipur tsürtemi goal 5-0 agi takok anguba yong Nagaland tsürtemi tanabuba jenjang ang ngua liasü.